外婆当家个辰光，还是市面浪物质紧俏、供勿应求个时代。勤俭节约、废物利用就是上海人巧当家个本事。比方外婆个灶头间，壁角落里总归有几样物事囥了辣海：

　　一样是破脱个碗爿。碗盏勿当心敲碎仔，外婆会拿里厢像自来火壳子介大小的几块碗爿留下来，这可以用来刨洋山芋皮。这种有快口个瓷碗爿还来得好用，薄薄叫刨脱一层皮，一点也勿会伤到洋山芋里厢。不过现在勿建议大家去尝试，一来容易伤到手，两来现在称手个工具交关，覅去冒险。

　　还有一样是乌贼鱼个骨头。乌贼鱼背心浪有块白颜色个、厚笃笃个骨头，这是擦钢种镬子个好工具。镬子用得辰光长了，难免焦黄发黑。侬拿块乌贼鱼骨头，稍微剥脱眼外面个硬壳，乃末对牢发黑个地方去擦。覅摆水，也勿必用太大力道。一歇歇功夫，镬子马上锃锃亮。擦剩下来个骨头，只要手浪捏得牢，下趟还可以用。这办法勿晓得最早是啥人发明个，真是“高手在民间”！

　　更加早，烧煤饼个辰光，外婆个灶头间角落头还有一只破面盆，是囥碎煤屑个。碎煤屑加水拌成糊，夜快头封炉子就可以派用场。有个人家还会自己做煤饼。

　　有辰光屋里向吃大一眼个鱼，鱼头浪个骨头外婆也勿厾脱。汏汏清爽，有心有相去插了一瓣大蒜头浪。过一歇，一只只飞鸟、蝴蝶、螃蟹佬啥就活龙活现出来了。拿根线吊起来，伊拉会得随风晃动、转身，邪气好看。灶头间马上有了灵气。外婆本来就是知书达理个知识分子，辛苦操持家务之余弄出点小情趣，一点也勿奇怪。