有人讲，上海闲话缺乏记录方言个通行易解个文字。假使迭能讲法，阿是需要发明汉字个仓颉老先生转世投胎，造出一堆字来表达上海闲话，就像广东闲话里向个“啲”、“哋”、“嘅”搿种呢？ 

　　我以为，汉字是老祖宗留下来个，普通话搭仔各地方言共同个财富，几千个常用汉字写写一般性个文章根本就是笃笃定定，大可勿必费心费力去造字。语言文字个特点，就是约定俗成，阿拉就拿北方话白话文来讲好了，人人侪晓得，“们”是人称复数个意思，又有啥人晓得，顶早个辰光，“们”是写作“每”个，“我们”就是“我每”，现在人看上去怪，700年以前个元朝人偏偏就是迭能写个。再讲个近点个例子，形容程度个“很”，垃垃早期个白话文里向，是写“狠”个，语文课本里向个鲁迅个文章里经常可以看到，学生子问起来为啥体是“狠好”勿是“很好”，教书先生只好讲是“通假字”，其实就是嫌鄙“狠”看上去勿适意，葛咾后来改了个字。连现在通行全国个白话文早期也是要写写看“毛估估”，看勿顺眼再“调一调”，上海闲话写出来有几个字拨人觉着奇怪，又有啥勿正常呢，“阿拉”两个字，跟要表达个意思勿差十万八千里么也差勿了多少，现在大家勿是侪习以为常？就像鲁迅先生讲个，“世上本没有路，走得人多了便有了路”，写了多了么自然有办法，勿写总归呒没办法。况且吴语的书面文学已经写了几百年了。 

　　作兴又有人讲了，侬就算勿新造字，写出来个物事外地人看勿懂，又有啥用场。葛末我就要问了，写出来全国人侪看得懂，搿个勿是就变普通话了么？方言方言，顾名思义，就是一方之言，假使搿篇文章是写拨全国人民看个，势必至于要用普通话白话文，但如果讲我要写个物事，我要表达个思想，就是拨懂迭个方言个人看个呢？搿能又何必强求一致？青菜萝卜各有所好，“大家闺秀”有“大家闺秀”个标致，“小家碧玉”一样可以有自家个风韵，世界难道勿是丰富多彩个么？ 

　　末脚补充一句，我伲老欢喜上海闲话个，作兴上面讲个闲话有人听了勿“焐心”，葛末也只好先表歉意，闲话堵垃心里勿讲出来，总归自家殟塞个。