蒲扇垃老早辰光是热天介里个大角色。勿像现在家家人家侪有得空调孵【bhu】孵，起码还有得电风扇吹吹。搿辰光扇子，特别是大众化个蒲扇是顶顶常用个乘风凉解暑气个必需品。一到六月里，百货店、杂货店跟小摊头就会得摆出蒲扇拨市民选购，价钿只有几角，顶多一块洋钿。蒲扇也叫棕扇、葵扇、蕉扇、垃上海跟江浙一带常常被称作芭蕉扇。蒲扇的原材料是蒲葵叶子。蒲葵也叫蒲扇树、扇叶葵、葵扇叶，搿个叶子长得老像棕榈树，只不过蒲扇树跟棕榈树是兄弟道里。老鬼【ju】个人家专门要买广东新会出产个，因为搿个地方是传统产地，已经有得1600多年的历史，垃1912年巴拿马国际博览会得过金牌奖。新会个蒲葵叶形状圆整、叶脉细润、色泽光洁、手感轻盈，所以做出来个蒲扇黄白均匀、扇叶柔韧、沿边细腻、结实耐用。不少人家也会得翻出囥了一年个蒲扇，揩个揩，汏个汏，弄清爽仔又开始用起来了。考究点个，还会得用旧布条穿针引线拿扇子边浪“沿”起来，搿能介蒲扇就勿会得脱脱边丝搧了散脱了。上海人喜欢用新会个蒲扇，主要还是因为这种圆形或者桃形个蒲扇形状大气，扇面开阔，轻巧好拿，搧出来个风量也大。

　　垃六七月里奥，家家人家侪离勿开蒲扇，有个人是一日到夜一刻也不离身个。一到日头落山，荫凉头出来，就有人朝场地浪向、朝上街沿浪向泼水降脱点热气。到吃好仔夜饭乘风凉辰光，侬看好唻，凳子浪躺椅浪坐垃海躺垃海个，还有兜来走去个，着棋打牌个，七嘴八舌个，每个人侪有得一把蒲扇捏垃手里向。搿辰光噢，天末蛮热，风也停了，灯光下头只看见忽闪忽闪个蒲扇垃拉摇摆，男女老少侪垃阵阵民俗个和风里觅着了人工特制个凉爽，搧出了超越自然个好风，真是一幅活生生个自得其乐大家同乐个清风消夏图。真个，搿辰光亏得有这种价廉物美个蒲扇，能够让阿拉抵抗热天，能够让阿拉搧过夏天。蒲扇摇摇风自来，摇轻摇重，风大风小，侪靠自己手浪个功夫。摇了重，也勿会出出汗来，因为风垃朝侬身浪搧；摇了轻，也勿碍，因为扇子靠了近，轻风时时搧过来。天勿凉快人自凉。搿种介的感觉，只好用“适意”两个字来形容。所以现在有人发微博回忆讲：蒲扇扇出来个风呒没空调介冰冷杀搏，也呒没电风扇介激情汹涌。蒲扇个风是心浪向个风，是有蒲葵清香个风，是亲切个风，是温和适意个风。

　　蒲扇还有得遮阳光、挡雨水、作坐垫、除灰尘、助睡婴、驱蚊子、升炉子等多种功能。垃阿拉小辰光，蒲扇还是白相干，有辰光当冲锋枪哒哒哒扫一通，有辰光当刺刀戳人家，有辰光插垃腰眼里装大人，有辰光变成簿子抄语录，有辰光就是苍蝇拍子拍蚊蝇，真个交关好白相。不过有个功能现在已经不用了，有个功能还垃延续。只要从五六月份开始，侬要是早浪夜到碰着抱垃大人手里、坐垃老人推个童车里、牵拉大人手里、跑拉老人前头个小囡，侬必定会得看到大人或者老人手里个蒲扇，当然，现在蒲扇勿大买得着，有个人用个是团扇或者折扇、纸扇。但是大多数人还是喜欢用蒲扇。看来，蒲扇现在已经成为护佑小囡个专用品了。有一首《蒲扇摇咾摇》的新童谣，大概是蒲扇垃拉当今个写照：

　　“蒲扇摇咾摇，宝宝好睏觉，苍蝇飞出去，蚊子勿要咬。

　　蒲扇摇咾摇，宝宝坐坐好，童车推得稳，凉风轻轻飘。

　　蒲扇摇咾摇，宝宝慢点跑，今朝实在热，等我蒲扇摇。"

　　大人用爱个节拍、用柔美个摇摆陪小囡成长，真勿晓得迭眼小囡长大仔会勿会得记起长辈个贴心照看，长辈个坚忍不拔……。

　　真想去买把老蒲扇回转来，真想笃悠悠笃悠悠个摇摇伊。