只有六成上海小囡能够完全听得懂沪语个局面有可能改变了，市教委最近垃拉答复农工党上海市委有关建议个辰光讲，会鼓励有关单位编写上海闲话教材，推动部分院校开设相关课程跟拓展课程，开展上海闲话个学习培训。

　　市教委个迭份答复，说明学堂个教学垃拉现在对于上海闲话个传承，有特别重要个作用。上海闲话是上海小囡个母语，母语方言是用勿着老师专门去教个，不过因为廿年来讲母语个氛围一年比一年淡薄。从1992年开始，学堂里个上海闲话拨拉明令禁止脱了，中小学生个日常交流再也勿讲上海闲话了，所以要拿迭根断脱个线接上去，首先就要从小学生开始，要由会讲上海闲话个老师专门带动一下学生，教一教，使得中小学生会讲上海闲话。市教委个表态，会得推动沪语拉学堂里个教跟学，推动沪语个传承、推广。小学里教师要行动起来，改变长期以来幼儿园、小学学生下课勿讲上海话个惯性，使得伊拉讲好上海闲话。搿一方面是因为“90后”勿讲上海闲话，“00后”更加勿会得讲，要是小学生搿一辈个“10后”再勿开金口，上海闲话就一记头碰着30年个断层，就会得再也呒没多少人会得讲了，断层就是一种语言个消亡，搿个是世界语言个死亡规律，大人讲得再好也是呒没用个。作为生活垃拉上海个小学生子，呒没任何道理突然之间跟养育自己个地方文化血脉去拗断脱。

　　8月份出版新编个《小学生学说上海话》，成为本市第一本进入学堂个小学沪语教材，老师有了范本，学生子有了课本，就勿会教勿下去，学勿下去了。让小学生子垃快乐学习、讲闲话当中产生兴趣，由兴趣而养成习惯，一旦习惯养成，就会得放学以后也讲，到屋里向也讲，出去白相也讲，不断个形成大人小囡一道讲，小囡从小讲到大个习惯。11岁以下个小囡，是学语言邪气快个辰光，就是新上海人个小囡，只要有语言环境，也勿要一个月，就可以跟垃海学会上海话。搿勿但有利于上海迭座城市文化生态个修复跟传统民俗气韵个激活，也有利于“新上海人”个小囡告本地上海人交流，有利于所有个小囡跟了伊拉个爷娘吸收海派文化当中敦本务实、顺势善为、守信重谊等和谐相处个大都会价值观念。小学生子学讲上海闲话，一眼也勿会得影响学讲普通话。通过学习跟训练，小学生子侪会得具备讲两至三种语言个能力。语言能力个增强跟交流表达方式个多样化，会得让小囡变得更加聪明、更加活泼、更加好学。