现在讲起上海老房子，大家肯定会讲是石库门，迭个自然勿错；不过，石库门是垃拉十九世纪中叶上海开埠后才慢慢叫形成个，伊个造型中西合璧，是阿拉近代上海民居个象征，统统加起来也不过一百来年历史。真正能代表上海本地建筑特色个民居，是名头叫“绞【gao】圈房子”个本地房子，历史起码要有二三百年长。

　　“绞圈房子”名字听起来好像有点土（侬想好来，石库门刚开始叫个辰光，有人也认为土得一塌糊涂），但伊是地地道道、的的刮刮个上海老房子。阿拉屋里向个祖宅就是“绞圈房子”，我从小生长垃辣“绞圈房子”里，所以脑子里记得邪气清爽。记得屋里向个“绞圈房子”原来垃辣上海近郊个北沙港22号（据虹口区志载：原系宝山县五角场公社工农大队，现为虹口曲阳新村），侬勿要看伊只有一个门碑号码，里向住着十多家人家，因为搿个是幢“绞圈房子”。伊前后三进，门面总共有七开间，铺垃大青石个乡村大道，垃拉宅前面穿过，清清个小河浜北沙港垃拉宅门前流过。老宅绞圈房子虽然勿是画栋雕梁，勿过也是深宅大院，一直到上世纪八十年代初，阿拉屋里向个老宅是全村庄独子王孙个“绞圈房子”。

　　今朝回想起来，伊至少有三大特点：一是绞圈而建，左右对称。“绞”末，好比上海人讲个“绞连棒”，是四面绞合个；“圈”末，是围圈团团仔住垃海。当中大门是老上海熟悉个“墙门间”，左右各有三间正屋；“墙门间”后面是宽敞个庭心（天井），庭心两旁边各有客堂一间，前后厢房两间；穿过庭心是大客堂，左右也是各有三间正屋。迭能介绞圈，坚固扎实，刮台风勿不怕；迭能介团团而居个日脚，好互相照看，防盗防窃防小偷。二是家族群居，本家特色。大约摸造垃十九世纪六七十年代，到二十世纪八十年代动迁，上下百来年，一个祖宗传下，三个分支，虽然历经六七代，子孙繁衍，住房总共20来间，全部姓朱，用句老古话来讲，绞圈之内，唯我朱姓哉。三是外似封闭，内则活络。“绞圈房子”外面看起来是团团封闭，实际浪内部空间勿要忒活络噢，垃辣中轴线浪，墙门间、庭心、客堂侪是家族个公共活动空间，迭些起码要占全部房子个面积四分之一还多，再讲每户人家侪有自家个宅基地，种眼白果树（银杏树）、竹林咾啥，是像模像样个后花园。迭些侪为阿拉小囡白相提供了广阔个天地。我小辰光白相游戏，既白相市区石库门弄堂个城里个“三子”：打弹子、跳绳子、打香烟牌子咾啥个海派情趣，也白相近郊特有个捉麻雀、𨒃野猫猫、放风筝咾啥个野趣；勿要忒开心噢！迭能介个“绞圈房子”形状有点像北京四合院，但垃竦建筑风格浪又要胜过四合院；比现在名声老响个福建土楼还要宽敞，还要漂亮。

　　故所以，阿拉忘【mang】记勿脱老宅“绞圈房子”！