热天介吃冷饮， 迭个是现代人特有个一种福分。当今冷饮市场浪，啥个味道呒没，啥个价钿呒没？有种味道?价钿又𠼢【qang】个冷饮人人欢喜。垃拉古代，即使侬贵为帝王，也呒没迭份口福享受。

　　晚清改革家、文学家梁启超拿自家个书斋取名叫做“饮冰室”，伊写个书叫做《饮冰室文集》，《饮冰室诗话》，看得出个，垃拉伊个眼睛里向，吃冷饮，是一种高尚潇洒个雅事。上个世纪三四十年代，冷饮也老少个，碰着三伏天，常常有一眼小贩垃拉弄堂里向穿进穿出叫卖：“阿要买冰啊？——机器冰哎，卖冰啊！”伊拉叫卖个是一种老大老大个冰块，要买个人拿出一二分铜钿，小贩就从大冰块浪敲下来一眼眼碎冰，买到屋里向后自家放眼米醋搭之白糖拌拌吃。搿种邪气搭浆个冷饮，埃歇辰光也吃得津津有味，还觉着味道好煞。再朝后，棒冰、雪糕问世了，啥个“美女牌棒冰”、啥个“米老鼠雪糕”，味道搭之花式品种，勿好告现在比个，但迭个是冷饮史浪个一趟飞跃。解放后，辣辣阿拉上海滩浪，光明牌冷饮一枝独秀，四分洋钿一根冰棒，八分洋钿一根雪糕，一直持续了二三十年。 

　　辣辣我小辰光，能够吃到一根棒冰是一桩邪气勿容易个事体。搿辰光屋里向穷是穷得来，阿爸老早就过世，屋里向侪靠姆妈一个人支撑辣海，伊要养阿拉兄弟姐妹五头，想想看搿个日脚多少难熬。我记得夏天介看到卖冷饮个小贩肩胛浪向背一只木箱子，拿一筷小木块一面敲打木箱，一面高喊：“棒冰雪糕吃伐？光明牌棒冰--”翻开箱子盖头，里向四周围用旧棉花毯捂得严严实实，棉花毯当中摆辣一根诱人个冷饮。我又吵又闹要姆妈买，伊囊中羞涩，我穷吵也是白白里个。不过有常时姆妈硬硬头皮，辣生活费中克下来四分洋钿拨辣阿拉买一根棒冰吃。阿拉五个小八腊子高高兴兴团团围辣姆妈边浪排排坐，看姆妈拿棒冰纸头剥脱，每人先拨辣姆妈咬一口，搿种难得个甜蜜凉爽味道从嘴巴一直写意到心里向。当时我心里暗暗发誓：等到我长大以后赚钞票，定规要一个人吃一根棒冰。现在想想，搿种“誓言”拨辣人家牙齿要笑脱落了，但当时吃棒冰的确是桩大事体啊！