现在有交关家长帮小囡买了智能手机，创造了老好个条件。迭个让我想起了老早底，人与人之间沟通实在是有点勿大方便。

　　首先写信末先要读过书，要识字，会写字。搿个就要花脱爷娘几化铜钿啊，写好信还要买邮票、跑邮局，也是老烦个。后来可以发电报了，不过发一个字要三分洋钿，大家恨勿得侪懂古汉语，好尽量少写几个字。再后来又可以打长途电话了，但是要跑到电话局先登记，排好队，等工作人员叫号头。本来就是有急事去打电话个，偏偏要等老长辰光。好容易排到了，听到“某某某，三号房间”，豪燥奔到三号小房间。碰了勿巧，闲话讲到一半线就断脱了，只好请接线员帮忙再接通线路。迭能样子一只电话打下来，背脊浪向已经出汗了，勿是身体热，是心里急，急死人。“文革”以后，弄堂口有电话间了，是传呼电话。一只弄堂一只号码，家家人家侪用迭只号码，打出去付四分洋钿。人家电话打进来了，传呼间个阿姨啦、爷叔啦就要跑去喊接电话个人，伊拉喉咙侪大来死个，“63号，前客堂某某某，电话！”一歇歇功夫，里向就跑出来一个人，鞋子还没穿好就啪嗒啪嗒跑到电话间。电话接好要付7分洋钿，其中三分是传呼费。上个世纪末，传呼电话差勿多侪淘汰脱了，家庭电话开始普及，不过初装费老贵【ju】个，要三千块。阿拉屋里呒没人做生意，装电话勿积极，拖发拖发一直拖到97年刚刚装。

　　现在好了，有手机了，沟通越来越方便。但是，交关年轻人是用手机来白相，跟人交流反而少了。随便科技发展到啥个程度，直接跟人接触更是心智发展勿可缺少个环节。特别要提醒家长，要引导好自家小囡。