新上海人讲勿好上海闲话，是因为有勿少上海闲话里个音大家发勿来。其实，只要会得发“哎、安、凹、欧”搿四个上海闲话里个音，就可以读准确一半了。

　　“哎” 搿个字个发音其实普通话里是有个。就是“夜ie、”、“月üe”中的音素e。但是伊勿单独发音。假使侬会得读英文，葛末“desk”、“ table”里向e发音也是一样个。

　　搿个“哎”上海人常庄要用个。比方：“哎，侬到啥地方去啊？”比方：熟人之间打招呼直接用“哎”，用勿着再叫名字；夫妻之间对话，上海人也直接用“哎”引起对方注意就可以讲闲话了。

　　“哎”是呒没声母个，阿拉可拿伊直接拼到声母里去。凡普通话里韵母是ai、ei，还有少量an个音辣上海闲话里侪读“哎”。比方：b、p、m、f、d、t、n、l、g、k、h、z、c、s，辣声母后头加“哎”就读“班、襻、慢、反、对、推、难、来、该、开、海、再、斩、菜、产、三、山”了。“推板”、“来三”、“难板”，侪是搿能读个。

　　用个顺口溜多读读伊，就会得读了：来来来，侬来伊来大家来，侪到阿拉屋里来。

　　“安” 搿是上海闲话里“安”、“碗”、“暗”个发音。搿个音稍微有眼难。普通话里向呒没，法语里倒有个，所以江浙一带个人学习法语侪邪气便当。

　　教侬一个读个方法。“哎”个嘴巴是扁个，拿伊收成圆个就对了。注意，勿好读o。读o舌头就到后头去了。搿两个音勿一样。s安zi ，so zi。前头是“扇子”，后头是“沙子”。 普通话里个an、uan，大部分侪是读搿个音个。

　　“安”是没声母个，阿拉可拿伊直接拼到声母里去。比方：b、p、m、d、t、n、l、g、k、h、jü、qü、xü、z、c、s，辣声母后头加个“安”就读成“搬、盼、满、端、贪、男、乱、敢、看、汉、卷、劝、选、钻、穿、算”了。

　　也用个顺口溜多读读伊，就会读了：衣裳穿穿，电影看看，钞票算算，饭碗端端。

　　记牢：一定要注意舌头位置，舌头个位子是辣前头个。假使侬摆到后头去，“钞票算算”就变成“钞票晒晒”了。