门槛精个是老鬼。本事大个是老鬼。事事、时时都精怪都内行个朋友有辰光也会一时糊涂做出失策个事体来。辣上海闲话里即是“老鬼失撇”。明明是假货是大卡，但老鬼个人还是会看走眼个。回到屋里向仔细一看，发现自家花了大铜钿吃进了冒牌货。“搿记上当哉，老鬼失撇！”以为自己是老上海、老土地，赶辰光省力气想讨近路，穿小马路、兜大弄堂七转八弯，结果小区改造之后弄堂横垛里个小门被起墙封脱了，白走了交关冤枉路。“老鬼失撇。想勿到现在一日三变！”老鬼失撇个故事三日两头可以听得到碰得着。同事老王常常跑码头出差，落脱了不少发票，回来就报销勿成功了。手机里一直有“提供正规发票”个短信，伊肉麻大钞票，就想花点小钞票去买点发票回来。一念之差就往对方打进去几百块。以后就石沉大海，毫无音信了。去报警？勿敢。买卖发票就已经知法犯法了，坍台。只好打脱牙齿肚里吞。老王算是老江湖了，搿趟老鬼失撇，吼势得勿得了。再收到搿样个短信，立马删脱。“上当只上一趟，总算老鬼了！”

　　上海人关于老鬼还有一句很形象生动个闲话，叫“老鬼勿脱手，脱手勿老鬼”。更发噱点个是“老鬼勿脱手，脱手是洋盘”。洋盘是老上海人眼中个屈死，勿识货、勿内行，是上了当受了骗还木头木脑发觉勿了个朋友。老娘舅因为要翻修屋里、粉刷房间，就把杂七杂八个家具处理脱一点。伊认为两只方凳只是实木敲出来个。就三钿勿值两钿拨收旧货个收去了。后来老舅妈发觉了已经来勿及了。收旧货个黄鱼车早就踏得呒没一点影踪了。原来搿个两只方凳是旧红木做个，老价钿了。老舅妈就此骂了老娘舅足足有半年多。“一直摆老奎冒充样样老鬼。上侬老当！老鬼勿脱手，脱手是洋盘！侬是只老洋盘！”有上海闲话来对对子，老鬼和洋盘正好是一对。老鬼可以算是天上好脚色。洋盘可以算是地上阿屈死。不过天上地下推扳勿远个。再老鬼个朋友一失策一粗涂也会做一趟洋盘个。我辣地摊上看见有卖真老虎爪子个，“一个只要二十元！”我动心了。摆摊个马上锯了一只老虎脚爪个爪子下来。伊用吊秤一称。“一千八！九十克！”原来伊交关阴险，以“一个廿元”来蒙骗过客，成交了就变成了“一克廿元”。买也要买，勿买也要买。勿然勿过门，几个连裆模子立刻围牢侬。想脱身？介便当！我搿个老鬼就此变成勿老鬼、变成老洋盘。现在搿只小小个真个老虎爪子我一直供着，提醒我一勿当心也会做成洋盘、屈死个。呵呵。