“爱上海·大声说”第二届主持人沪语大赛，12月19日、26日辣海金虹桥商场经过两场复赛，张蕾、麦子、严丹、秋深、郭亮五位选手进入了决赛，决赛将于1月3日12点到13点辣拉上海月星环球港四楼演艺中心以直方式进行。

　　五位进入决赛个选手沪语 “级数”、水平的确要高一些，但就“爱上海·大声说”个真诚态度、参赛热情来讲，初赛、复赛已淘汰个选手告决赛选手是一样个。

　　学习、掌握一种新个方言，客观上个体之间确实会有快慢差异。搿次主持人沪语大赛所呈现个情况，相信其他许多新上海人学习沪语时也会碰到。新上海人生活工作辣上海、上海人当中，语言环境是有了，但要真正理解、会说沪语也并勿容易，耳听勿实，听豁边还有时闹出误会，发音则难以从习惯个原家乡话、普通话中拗过来。搿个辰光，有一本通俗个教本就显得邪气重要。搿次大赛同为评委个上海大学中文系副教授丁迪蒙赠钱程老师搭我及每位参赛选手个《听听说说上海话》（少年儿童出版社2014年版）正是搿样一本教本。丁老师是上海话教学、上海话、海派文化方面个专家；《听听说说上海话》通过方方面面八十场情景对话，让人学说上海话个同时，也了解上海个风土人情、历史文化，书封内还附有二维码，可以手机免费下载配套音频，方便学习者“眼见为实”，边听边看学沪语，而且既正音又正字，学会说沪语个同时还顺带了解了沪语个基本日常书写。丁老师还有一本《学说上海话》（上海科技文献出版社2014年12月二版）也可供初学沪语者参考。 

　　现在学习、做事体侪要讲求效率，新上海人学说沪语要是有搿样个教本相帮，就可以避免误听误读，找到正确个学习门径，起到事半功倍个效果。大赛即将进入决赛，我私底下想，要是初赛、复赛已淘汰个选手中，有几位之前拿到搿样个教本学习后再来参赛，恐怕比赛个结果也会得勿一样呢。