昨天回家路上，差头司机突然问起我农历啥日脚了。我说，明朝要吃腊八粥了。年过半百个司机勿禁慨叹,现在过年，也太呒没样子了。是呀，放辣过去，迭个辰光家家户户早就忙得个七七八八了。

　　首先就是买年货。勿但要凭票证，还要半夜三更去排队。鸡鸭鱼肉、皮蛋烤麸、糯米芝麻、花生红枣、金针木耳，悉数配给供应，要分头去排队买，化个三五天是常事。

　　回到家里，公用厨房里又是另一番闹猛。邻居互相总要评头论足一番：侬买个母鸡肚皮里还有软壳蛋，阿拉个带鱼肚肠烂出来了，大粒花生呒没小粒花生香，大炮红枣卖相勿错味道推扳，连绵白糖也要拆包，放到亮光下面去比较一下。

　　接下来个便是腌。一块猪后腿，勿能用生水洗，切开几条缝，抹上粗盐花椒，穿上麻绳吊到阳台浪。今年只请一桌客人，用半只鸡、半只鸭做做冷盆，已很拿得出手，余多两个半只也腌一腌，挂到厨房窗外个钩子浪。乡下亲戚送来个鳗鲞，也要用竹筷撑开肚皮寻地方挂。一时间，弄堂阳台里、窗檐下、晾竿上，处处琳琅满目。

　　浸，也是江南人家必勿可少个，尤其阿拉宁波人。有三样东西必浸。一曰糯米。过年呒没水磨粉，勿吃猪油汤团哪能来事。糯米至少要浸两日两夜。二曰年糕。年糕年年高个意思，大家要讨口彩。只是当年个年糕少有糯米做个，一般用粳米，有个还掺杂少量早籼米。粳米籼米性硬，所以也要事先辣冷水浸，搿个又是几盆几钵。三曰笋干。呒没水笋烤肉，也要举家勿欢。老话说，一斤浸七斤，即一斤闽笋干可以浸得七斤水笋，但又是需要容器。

　　此时，家里早就盆满钵满。由于容器紧张，勿晓得从哪年开始，阿拉姆妈就要阿拉先期开切。毕竟切开个水笋、年糕碎片占个体积经济划算。但呒没切过，还真勿晓得其中之难。大冷天，又侪是石骨铁硬个东西，很多时候双手压刀背还勿够，还要伸直手臂，脚也要踮起来用力，才切得开。呒没切多少，就会去磨一磨刀，忙煞。

　　年糕水笋靠切，糯米就要靠磨了。伊辰光，石磨往往十来家人家中，才有一家有，于是邻舍隔壁大家商量出个先后秩序，轮着用。轮到拿磨搬来，也只有一两天时间。只好连夜推磨。

　　还有就是做蛋饺了。老早过年，勿论是自家人个年夜饭，还是年节里请客，最后上个砂锅汤，一律是下面放个蹄髈，白汤，上面放黄芽菜、粉丝，还有就是蛋饺了——迭个是基本规格。考究点个再放肉丸、熏鱼咾啥，葛末就是三鲜砂锅了。蛋饺所以要末勿做，做起来侪是几百只，最少也要百多只。做蛋饺勿能用大火，要微火，所以都是煤炉先封起来，上好铁板后，就着一只小孔来做。辣搿方面，煤气灶竟毫无优势可讲。所以，阿拉姆妈有时宁可走好长一段路到弄堂里去借只煤炉来做蛋饺。

　　伊个年头，圆台面也勿是家家都备有个。也是要靠邻舍隔壁事先商量，安排好客人，轮仔用。到辰光，勿但圆台面事先扛过去，还顺手送几只骨牌凳过去，客人多了，家常个不见得够用。归还个时候，还有一番攀谈呢。“哟，伊个瘦瘦长长个是爷叔啊，卖相好得来，鼻头管煞挺，外国人一样喏。”“还有，二娘舅女儿覅看只有五六岁，长得比伊拉娘还要漂亮，大起来追伊个人肯定摸老老。”“寻着伊也勿一定吃得牢，哈哈哈哈……”

　　写着写着，真想到很远很远个乡下去过个年。乡下个年味道总归还比匆匆忙忙个都市里来得浓。