要出去白相两天，就跑到屋里附近一家体育用品商店买鞋子。按照阿拉姆妈个讲法，搿就叫：上轿穿耳朵，临时抱佛脚。

　　本来只想替老公买一双男鞋，挑挑拣拣，选中一双，试好了，就顺口问一声营业员小姑娘：“阿有打折啊？”

　　虽然晓得讨价还价有点让人触气，不过有趣呀，少了迭只环节，总觉得买末事少脱交关乐趣。尽管大多数辰光纯粹是譬是勿是。

　　呒没想到小姑娘老早就准备好了，张口就来：“买第二双一道打八八折。”

　　我顿时心动，就讲：“好啊，搿末再买一双女鞋好了。”其实也勿完全是心血来潮乱买八买，我原来个一双旧鞋子有点勿跟脚了。

　　小姑娘拎仔两双鞋子过来了，伊还拿了一只计算器，一边揿一边讲：“是迭能个，两双鞋子打好八八折正好500元，侬索性再买一条裤子，就可以打八折了。我帮侬算一算哦，喏，打下来509元，等于是侬花9元买了一条裤子，老格算个。”

　　我继续咬钩，讲：“好呀，就是搿条裤子花里八拉，帮阿拉调一条一末色个。”

　　小姑娘答应一声，重新算账道：“494元。哦哟，比刚刚还便宜6元，等于白送侬一条裤子！”

　　回去路浪向心里想：到底是啥人挞着便宜了呢？