A22:上海闲话/星期天夜光杯
     
本版列表新闻
     
2018年06月24日 星期日 放大 缩小 默认   
屋里有只老式咖啡壶
钱红春
  文/钱红春

  最近,看到帮助自闭症小囡掌握工作技能个“爱·咖啡”店,辣辣社会各界爱心人士个支持下头又重新开张,我勿由得想起自家屋里伊只老式咖啡壶。

  搿只铝制老式咖啡壶是我上世纪八十年代初,参加单位联欢会获得个奖品。搿种咖啡壶结构邪气简单,壶身跟大口啤酒杯差勿多,只不过下头大,上头小,壶身外头有盛水容量刻度,壶盖中央有只玻璃球,壶里有根比小拇指头细点个空心管,管子底部有固定底座,上半段有只管子穿过中心并固定好个漏盆。烧咖啡个辰光,先朝壶里加水到需要个刻度,再拿磨碎的咖啡放到漏盆里,盖头盖好,空心管正好对牢壶盖当中个玻璃球。水烧开后,水会通过空心管冲向玻璃球回流到漏盆,经过迭能反复滴滤,咖啡就慢慢烧好了。

  不过,埃个辰光阿拉平常只喝白开水,再加上经济能力搭勿够,所以搿只咖啡壶就一直厾辣角落里积灰。

  记得好几年后个一天,我路过一家咖啡店,闻到一阵阵咖啡香,就想“开开洋荤”,但一看价钿又舍勿得。当我正要离开个辰光,看见柜台角落头里有块纸牌,讲店里有咖啡渣供应,每斤只要一角洋钿。心里想,头潽咖啡喝勿起,尝尝二潽咖啡也蛮好,就称了一斤。回到屋里用自家咖啡壶一烧,啥人晓得颜色倒是变成咖啡色了,但尝仔一口,只觉着清咣咣淡刮刮,呒没一眼咖啡味道,同白开水呒啥两样。后来我对人家讲起搿桩事体,人家笑得捧牢肚皮告诉我,咖啡渣勿是让侬回壶重烧喝个,人家买回去是用来吸难闻个味道,用来种花养草或者去油腻擦镬子个。讲好以后,还穷笑我:“啥人像侬介洋盘,咖啡买勿起,去买咖啡渣。”弄得我邪气尴尬。从此以后,我再也呒没用过搿只咖啡壶。

  随着改革开放个深入,日脚一天比一天好,路边个咖啡馆比小辰光热天个茶水摊还多,有辰光阿拉也会同亲朋好友到咖啡馆孵孵。后来市场浪流行电咖啡壶,我也买了一只,自家辣辣屋里烧咖啡,平常有客人来,也是咖啡招待。前几年,我嫌弃买来磨好个咖啡粉勿及现磨咖啡香,就“鸟枪换炮”添置一台集“磨豆、电热、滴滤”于一身个咖啡机,机器一开,屋里向侪是咖啡个香味道。

  至于伊只烧过一趟咖啡渣个老式咖啡壶,前两天又拨我翻箱倒柜寻出来。老婆问“寻出来做啥”?我告诉伊,地区有关部门为了反映改革开放四十年来居民及家庭生活个变化,要举办一场“珍藏的记忆——老物件展示”活动,我想仔半日,搿只老式咖啡壶蛮能说明阿拉屋里个变化,就寻出来,准备拍成照片先拨伊拉看看,假使能拿出去展示,倒也是桩蛮开心个事体。老婆讲:“喔唷,我想老头子哪能越老越糊涂,当仔侬又要烧咖啡渣了啦。”我讲:“侬还当我洋盘啊?现在日脚越来越好过,阿拉是越老越起劲哉!”

     
放大 缩小 默认   
   第A01版:一版要闻
   第A02版:要闻
   第A03版:上海新闻
   第A04版:新视界
   第A05版:新视界
   第A06版:文体汇
   第A07版:文体汇/人物
   第A08版:伏尔加之波
   第A09版:伏尔加之波
   第A10版:伏尔加之波
   第A11版:伏尔加之波
   第A12版:目击/新民印象
   第A13版:目击/新民印象
   第A14版:国际新闻
   第A15版:星期天夜光杯
   第A16版:读书/星期天夜光杯
   第A17版:星期天夜光杯/夜光杯
   第A18版:夜光杯/星期天夜光杯
   第A19版:星期天夜光杯/影视
   第A20版:新智/星期天夜光杯
   第A21版:星期天夜光杯/百姓纪事
   第A22版:上海闲话/星期天夜光杯
   第A23版:星期天夜光杯/快乐作文
   第A24版:特稿/星期天夜光杯
八十年前个一次庙会
吃亏就是占便宜
大安里记忆
周建国沪 谚熟语印
上海话里个“花”
屋里有只老式咖啡壶
新民晚报上海闲话/星期天夜光杯A22屋里有只老式咖啡壶 2018-06-24 2 2018年06月24日 星期日