现在人有交关办法，可以让竹头随便啥辰光长出来。不过，只有立春以后，拨春雨淋过个泥里蹿出来个笋才是春笋，只有用春笋笃出来个腌笃鲜再称得上是春天头道鲜。

　　葛末，先挑笋，要拣外壳嫩黄、笋肉鲜白嗰，外形看上去矮矮胖胖、竹节比较短、稍许扁一眼嗰。至于又细又长嗰，还是让伊拉长成笔笔直、老老长个竹头，将来用来晾衣裳或者用来造房子辰光搭脚手架。

　　既然叫腌笃鲜，“腌”咸肉也是要紧嗰。老底子阿拉屋里是辣腊月里就开始准备了，买上好腿肉，用花雕、白酒、花椒、粗盐一道腌透之后，每天用晾衣裳竹头扛进扛出晾干，再寻通风阴凉头里挂辣海，需要个辰光，斩一块下来。假使呒没迭眼工夫还想烧腌笃鲜，就只好去买块南风肉来充数了。

　　有了咸肉，再买块新鲜五花肉，就可以开始“笃”了。竹笋弄清爽切滚刀块水里焯一焯；咸肉鲜肉跟葱姜一道摆辣冷水里烧滚，淋黄酒，再拿出来，汏清爽切块；然后，肉跟笋一道摆进汤锅，加足水——至少完全淹没肉块和笋块。大火烧开，撇清浮沫，改小火慢笃，搿能笃出来个汤味道鲜洁又煞辣势清。

　　后来也有人习惯摆一眼百叶结，讲是吸油；又有人摆点香乌笋进去，勿过此笋非那笋，勿是必需品。其实，只要咸肉、鲜肉、春笋三样末事，就足够笃出一碗“字正腔圆”个腌笃鲜了。

　　至于需要笃多少辰光，侬笃一趟就晓得了。

　　【沪语解释】

　　笔笔直，老老长：形容很直很长。

　　煞辣势清：非常清。