大衣橱里有一件藏青色新华呢中山装。其实迭件衣裳，我已经基本浪勿穿了，但是屋里向经过几趟装修，好几次清理衣橱，一直舍不得拿伊清理脱。有辰光看见迭件衣裳，脑子里会闪出来四十多年前排队买新年衣裳个事体。

　　埃息辰光，我辣崇明农场工作。一月初，我利用回上海过年个假期，去南京路荡马路，想要为自家买一件过年个新衣裳。经过南京西路靠近江宁路口个江南服装店门口，玻璃橱窗里一件藏青色中山装吸引了我个视线。我马上进店询问，一个男营业员告诉我：“迭件新华呢中山装现在呒没货，侬要买明朝开门前早点来排队。”

　　买衣裳还要排队？放到现在人家侪要看勿懂。但是埃息辰光，市面浪物资供应紧张，买东西排队是正常操作。为了能买到过年个“出客”衣裳，我夜里向困觉一直提醒自家勿要困过头。屋里向有闹钟，但是怕惊动屋里其他人呒没敢用。还好第二天早浪4点钟醒过来也不想再困了，轻手轻脚爬起来，一路小跑赶到服装店。天还呒没亮，店门口已经有好几十个人排队，队伍从南京西路店门口小转弯一直排到江宁路。迭个辰光，离商店开门还有3个多钟头，天气交关冷、肚皮邪气饿。好在我辣农场里工作期间也是过过苦日脚嗰，迭个勿过是小菜一碟，捂牢肚皮踏踏脚，辰光就过去了。

　　等到商店开门，排队个人侪拿到一张号码纸，按次序试衣。幸运个是，搿天店里进个货里小号衣裳比较多，我个身材比较“小巧”，总算“抢”到一件合身嗰，标价60元。开开心心去排队付钞票，但是想到搿件衣裳个价钿相当于一个多月工资，心里又有点肉麻。买好衣裳回到屋里，心里又有点勿踏实，勿敢拿出来拨爷娘看，暗黜黜塞到大衣橱里。爷娘一向做人家，吃穿用度侪是精打细算，看到我买介贵个衣裳勿晓得会勿会骂我脱底棺材。直到大年初一早浪向穿出来，爷娘弟妹看到我穿介挺刮个衣裳一下子侪呆脱。新年新始，爷娘也不好讲啥难听闲话。不过我也比较识相，过年穿过几天新衣裳后，马上挂起来。过些辰光洗烫后，挂了衣橱里放到下一个新年再穿，就搿能搿件藏青色中山装一连穿了6个新年。后来，江南服装店又推出米黄色新款滑雪衫，我又赶早去排队，“抢”到搿件新款。上个世纪90年代初，有一年过年前，上海开始流行皮夹克，雪豹皮草行总店门口排起三四百人个长队，我冒雨排队三个多钟头，花了500多元买到一件咖啡色皮夹克。现在回想搿眼过年买新衣裳个事体，心里别有一番滋味。

　　再后来几年，国家大力发展经济，服装店和商场里各种款式、各种面料个衣裳像变戏法一样越来越多。我与妻子结婚个辰光，又买了交关衣裳，但是再也呒没碰着排队个事体，排队买衣裳成了历史。阿拉屋里个收入也勿断增加，每年买个四季衣裳同样“水涨船高”。妻子是个欢喜跟潮流个人，外头流行啥款式个衣裳，马上就会拎回来。儿子欢喜穿品牌服装，每年换季辰光总要更新一下衣橱。我上了年纪，辣穿着打扮方面已经呒没年轻辰光个“冲劲”，但是打开衣橱，我个衣裳也不少，除脱好几件西装、大衣、滑雪衫，各种颜色、款式个羊毛衫、衬衫、茄克衫和T恤衫也是琳琅满目。衣裳多了，屋里又陆续增加了2只大衣橱，还是塞得拍拍满。

　　好多辰光，妻子外出要换衣裳，但是挑挑拣拣老半天，始终难以决定穿哪件。我嘲笑伊：衣裳太多拣花眼。勿过，想想自家有辰光也会有“拣了穿”个“烦恼”，我个嘴巴就关脱了，迭个也蛮好白相嗰！