伲家主婆是的的刮刮个上海本地人，阿拉老早到本地人屋里向吃喜酒，圆台面上是十只海碗，叮叮当当、汤汤水水，一个字：“湿”！当然，迭个湿勿是埃个“涩”，本地厨师手势本来就是搿种介嗰。本地人还会做“干”菜，外加另有一功，咸酸饭便是一例。

　　咸酸饭，听起来好像是又咸又酸个饭，其实勿是搿能介嗰。咸，好理解；酸，阿拉讨教过交关人，侪勿晓得，呒没办法考证。现在一般来讲，咸酸饭用上等粳米为原料，以咸肉、五香豆腐干、香菇、黄豆、山芋、青菜为辅料。制作步骤为：先拿咸肉汏清爽，放辣开水当中烧一潽，去腥焯水，捞出后搭仔香干、香菇、山芋等切成丁块状；起油锅先拿黄豆氽到金黄色，然后依次加进辅料稍微煸炒，沥净残油起锅；再拿辅料放进米镬子，添水、放调料、拌均匀，大火煮，小火烘。初看起来，好像跟做家常菜饭呒啥两样，其实咸酸饭个关键是辅料里必须有本地特色——黄豆。迭个黄豆来自上海个当年生毛豆，本地大青豆向来一烧就酥、糯润可口。黄豆作为“同盟军”，一则点缀色彩，红、黄、白、青、橙、紫，弹眼落睛；二则增添嚼头，健齿生津，舒展面孔神经。迭个叫：养眼、养胃又养容。

　　烧咸酸饭是我老丈人个拿手好戏。想当年，我“毛脚”上门，人还呒没进门，就辣弄堂里闻到一股菜饭香。原来是“泰山大人”辣辣炉子浪向烘烤咸酸饭，一只钢精镬子烘得黑铁墨托，像祖传“老货”。镬盖一掀，香得我馋唾水答答滴：米粒晶莹透亮，含一口油而不腻、口齿留香，嚼一口糯而不黏、味道无穷。我胃口大开，连吃三碗，大呼过瘾。顶崭个是镬子底下一层琥珀色锅巴，刮辣松脆。我心里想：搿顿饭一眼也勿推板，天下美食不过如此。

　　当然，老丈人做个咸酸饭介好吃，搭仔伊个“烘功”密勿可分。老丈人烧饭从来不用电饭煲，看看被烘得面目全非的钢精镬子就晓得了。有句闲话叫“功夫在诗外”，想来老丈人做饭个功夫侪辣辣饭外。

　　老早辰光听滑稽戏大师姚慕双跟周柏春合讲《新老法结婚》个段子，讲到宁波人结婚劝吃时有一段讲法“汤吃，菜吃，统吃光！”叫人喷饭：我拿伊改为：“饭吃，菜吃，统吃光！”咸酸饭，亦饭亦菜、鲜香味美、是让我难以忘记个一道美食。