上个世纪60年代，正是我个童年时代。迭个辰光上海马路多数侪是狭来西个，大马路呒没几条，地铁是连听也呒没听到过。辣拉我个印象当中，公交车个路线勿超过100路。其中1路到10路是有轨电车，11路到29路是无轨电车，30路到90几路是公共汽车，分得倒是蛮清爽个。我记得，我小辰光顶欢喜乘有轨电车，车子轰隆隆压过路轨，我心里向就会有一种莫名其妙个满足。其中3路有轨电车是从虹口公园开到五角场，感觉老远个。过了大八寺（现在改名大柏树），两旁边侪是农田，属于典型个乡下头。当时五角场呒没啥高房子，五条马路交汇个地方好像是一只大花坛，3路车终点站就辣搿个地方。人立辣搿地方，视野是最好个，五条马路侪看得清清爽爽。现在五角场正当中生出了一只老大个“扁蛋”，我勿管立辣啥地方，侪看勿到对面房子了。有辰光老眼昏花，连方向也分勿清了，明明是想到黄兴路去，结果从地下穿过到了地上，一看是四平路，还要再从地下穿过走上来，两条腿已经吃力得抖豁豁了。不过，小辰光阿拉同学道里顶欢喜乘个是辣杨树浦路上面开个8路有轨电车。因为8路电车可以开到像天堂一样个外滩搭仔南京路，白相起来最有劲了。橱窗里有交关好物事，看也看勿过来，木知木觉一两个钟头就溜过去了，下一次再来，勿晓得要等多少日脚。

　　讲到车票，也是有轨电车最便宜，3分洋钿可以乘三四站路。不过3分洋钿对阿拉小八腊子来讲，又意味着好买一只大饼，所以阿拉勿大舍得乘车子。假使讲只有两三站路，阿拉一般性侪是走过去，省下来钞票好买点零食咾啥。无轨电车起步价是4分，好乘4站路。公共汽车最贵，起码要5分洋钿，最多乘5站路。不过因为路线多，去个地方也多，所以阿拉屋里向个人乘了最多个还是公共汽车。跟阿拉关系最密切个车子是控江路上跑个61路搭仔70路。搿两条是热门线路，因为是辣大杨浦，所以乘客特别多，交关侪是工人阶级要乘汽车上下班。当时70路是所谓“巨龙车”，就是有两节车厢，当中靠一只转盘连起来，转弯个辰光，坐辣转盘上个乘客身体也会一道转过来转过去，告咾要当心一点。61路倒是所谓“两节生”，两节车厢是分开来个，当中用部件连起来。看61路开车，感觉前头车厢好像是姆妈，后头车厢好像是小囡，姆妈要拉小囡，但是拉勿牢，左右摇晃，吓丝丝个。当时控江路路况勿大好，坑坑洼洼，车子开起来总归颠来颠去勿适意。记得萧王庙站（现在鞍山路站）附近就有一个大坑，车辆靠站必须邪气当心。70路稍微好一点，61路就惨了，经常是前头车厢绕过去了，后面车厢绕勿过去，一记头歪到大坑里，引来车厢里一片叫声。如果碰到落雨天，还要加上路面上个人一片埋怨声了。

　　想想当初，看看现在，真是勿好比了。地铁通了十几条，公交车多到900多路。新型电动公交车也越来越多，车厢里个配置老好、老适意个，热天空调风凉得来，坐上车子简直舍勿得下来了。不过，老底仔个公交车我也忘勿了，伊带拨我个是童年美好个回忆。