三日两头跑旧书店，淘旧书，现在年轻人听来，有点像“白头宫女说往事”，勿大能理解。 

　　我勿晓得自家是哪能会欢喜淘旧书个。讲得早一点，大概辣上世纪七十年代后期，上海旧书店陆续恢复营业，除福州路总店外，还辣三大商业街南京西路、淮海中路、四川北路开有门市部，我侪去过。后来，商业街愈来愈繁华，旧书店愈来愈萧条，好像两桩事体相冲一样，只留下了福州路浪孤零零个一家，“光杆司令”苦撑日脚。再后来，我发觉长乐路上挂起了一块“新文化服务社”个牌子，还以为是卖卖学生铅笔、橡皮个文具店，走近一看，开心得我差点昏过去，搿是一家旧书店啊！打听下来才晓得，迭家旧书店是改革开放个产物，由几个旧书店退休职工“发挥余热”，自发组建成立个。我是一有空就去搿家书店。有一趟我去，抬头一看呆脱：“铁将军把门”，门口贴了一张布告：“本店因市政动迁，即日起搬到打浦桥瑞金二路弄堂里”。我豪燥赶过去，七转八弯，辣海弄堂里头，石库门旧房包围当中，寻到迭家旧书店，好像过去地下党找到仔党组织。我想，勿辣沿马路，普通顾客勿容易寻到，但我倒蛮欢喜个，旧书店就应开辣搿种安静个地方，呒没噪声，呒没喧哗。淘旧书，静静叫慢吞吞翻翻看看，又勿是小菜场里买菜，哇里哇啦做啥。辰光一长，我搭旧书店里个吴经理混熟了，吴经理老照顾我个，晓得啥个书对我胃口，总是帮我留辣海，收费还要打个七折八扣。我屋里向旧书，像倪海曙专著《铁马记》，解放前出版个《上海通俗语及洋泾浜》，还有《青浦田歌》，搿些关于上海闲话个旧书，脱仔勿少民国版老期刊，侪是辣搿搭淘到个。 

　　另外，我也会辣辣礼拜天，去文庙淘旧书。有辰光，看到路边有零散旧书摊，也要停下来东看西寻，像觅宝一样。淘旧书真个老扎劲个，只有在搿种辰光，我才心绪安宁，气定神闲，享受内心真正个自由。 

　　可惜，现在旧书店、新书店，搿些实体书店侪勿大景气，今朝迭家无奈搬脱，明朝挨家关门打烊，实在是桩伤脑筋个事体。 

　　我淘旧书，欢喜一家头，笃悠悠。“静悄悄的我走了，正如我静悄悄的来”，我不带走一片云彩，却心满意足夹上几本旧书，匆匆消失辣城市另一头。 

　　书友文朋找勿到我，我就调侃个跟伊拉讲：“我勿辣辣旧书店里，就辣间去旧书店个路浪。”