垃现在奉贤区奉城镇头桥社区个北宋村，奉贤县人民政府建立个 “抗日时期北宋战斗烈士纪念碑”，高高个树起垃海——七十一年前，此地打过一场硬仗，新四军浦东支队支队长朱亚民讲，葛是一场“惊心动魄的北宋突围战”。当时，敌人接到坐探情报，连夜调动八个地方个一千多兵力，要想包围仔一记头消灭脱新四军浦东支队。

　　浦东支队紧紧依靠群众，坚持垃敌人严密封锁个“清乡区”里向作战，采取避风头、扒“蟹脚”、打得狠、撤退快个游击战术，狠刹了日本鬼子、黄狗（伪军）、黑壳虫（伪警察）咾啥个嚣张气焰，敌人吓得来收缩脱交关据点，勿敢轻举妄动了。但是暗地里，日本鬼子一直想寻机会消灭新四军游击队。

　　1944年3月27日半夜把【半夜时分】，浦东支队冒仔大雨从南汇转移到奉贤北宋。朱亚民一面让部队烧水拨战士烘衣裳泡脚休息，一面马上布置夜里警卫跟明朝要做个事体。翁阿坤中队、赵熊中队、支队部告【和】常备大队一百五十多人就分开垃宅基个东南、西北还有当中间住下来了。

　　第二日清早五点多眼，宅西北个赵熊中队一早出操。突然，有人透过雾露发现西面麦垅里探出一只军犬个狗头，后头跟仔戴钢帽个东洋乌龟！赵熊马上命令开枪！

　　枪声一响，正垃考虑工作个朱亚民，一个翻身从躺垃个门板浪碌起来，一手抓手枪一手抓子弹个同时，判断敌人还是用“分进合击”个老办法打过来个，伊当机立断，派警卫员潘海根向下面下达了分路阻击、掩护群众、分散突围三道命令。大家刚刚跑出屋门，两颗掷弹筒打过来，场浪个稻柴堆“轰”个着了起来。

　　机枪声密集猛烈。从奉城过来个日军宪兵队、警备队、汪伪中央税警四支队，拨拉翁阿坤中队、赵熊中队打脱了好几个。而从新场、大团、六灶、周浦、川沙、南桥出动个敌人还垃雾露里向 “分进”过来。趁敌人还呒没形成“合击”之势，部队分三路拼命突围。

　　朱亚民带翁阿坤中队，用三挺机枪朝东一路狂扫，迫使从大团、四团过来个敌人分散兵力，眼见得空出一只空宕，就一记头冲了出去，一个班马上占领东南角个牛车棚，打退了敌人个好几趟进攻。翁阿坤中队冲过第一圈包围，甩脱了敌人。但是，牛车棚里个一个班，却拨敌人用掷弹筒炸呒没脱了。

　　西北方向个赵熊中队打得邪气激烈，敌人咬牢勿放，部队只好边打边退，刚刚渡过界河，又碰着从新场、周浦过来个敌人，中队英勇顽强，打了两个多钟头个拉锯战，终于厾【dok】脱了尾巴。

　　支队部搿一路向北突围，发现中心桥敌人火力密集，连忙转到东北方向，接连扑过几条河，赶垃合围前头冲出了包围圈。

　　市区个日本鬼子也出动了，围攻北宋个敌人还垃拉戆郎戆郎从几路连牢仔开过来，敌人当仔【以为】浦东支队主力还垃北宋，一直打到十点多钟，再发觉北宋老早就撤空了，弄了半日是垃自己打自己。日本强盗兽性大发，拿北宋个房子全部烧光，财物全部抢光。后来，浦东支队拨出一笔钞票，通过当地党组织，让群众重建家园。

　　搿一仗，浦东支队粉碎了敌人妄想消灭当地抗日武装个企图，打摋【击毙】敌人廿几个、打伤三十几个，自己也有廿多位同志英勇牺牲。但是，跟部队一道撤退个八十几名北宋群众，呒没一个人伤亡。

　　朱亚民后来回忆：“北宋突围战是抗日战争时期，发生在浦东的规模最大的一次战斗”。从此以后，日本鬼子勿敢轻信汉奸个报告，勿敢大规模出来“扫荡”。让东洋赤佬想勿到个是，新四军浦东支队勿但消灭勿脱，而且越战越勇、越战越强。浦东支队垃敌人个眼皮底下主动出击，垃战斗当中发展壮大，部队从1942年一支十二个人个短枪队，发展成1945年抗战胜利北撤辰光有一千五百多人个新四军淞沪支队，控制了浦东奉、南、川广大农村，搭苏南、苏中个新四军形成了鼎足之势。搿支部队总共歼灭了两百多个日本鬼子搭仔一千五百多个伪军、顽军，还策反了好几百伪军起义。垃浦东个游击战当中，主力部队先后有一百多位同志英勇牺牲。

　　立垃北宋抗日烈士纪念碑面前，我充满了崇高个敬意，先辈们勿畏强敌、英勇奋战，依靠群众、敢于胜利个斗争精神，永远值得我伲记取告发扬。