毒日细风一树蝉，树头欢唱到天晚，听着小区树林里知了叫声，我想起了小辰光捉知了个事体来。

　　知了，老一辈叫“野树头”，大约取伊一天到夜“野”垃树枝浪向个意思。《上海话大词典》称伊为“药胡翅”“药史太”。葛末，哪能捕捉高居枝头浪向个知了呢？用橡皮弹弓打，弹中“药胡翅”也是粉身碎骨，呒啥好白相了；爬树捕捉，“药胡翅”一双眼睛虽大而无神，不过伊对树枝摇动来得敏感，只要有一眼眼动静，伊“呀”个一声，拆下一泡尿【sy】，老早就飞走了。阿拉小辰光常用个办法是巧借蛛蜘网捉伊。

　　办法是用根粗铁丝，拗成直径10厘米大小个圆圈圈，再用细绳子拿伊扎牢垃晾衣裳竹杆个顶头。天色刚刚有点放亮，阿拉提仔迭个捉“药胡翅”个工具，到屋檐下，柴堆旁，小弄堂里找蛛蜘网。千万勿能等到太阳照到树枝头，否则蛛蜘网就呒没粘性了。蛛蜘网大多直径一尺长短，阿拉就用浪衣裳杆头个圆铁丝圈，像卷画轴一样，从蛛蜘网个最左边再向右边卷去，迭能介就能轻而易举个把蛛蜘网移植到圆铁丝上了。大约找到七八张蛛蜘网，一张捉“药胡翅”个罗网就做成了，而且是两面侪好用。然后阿拉迭帮小囝就拿着迭张罗网，穿梭垃绿树当中，啥地方有“药胡翅”叫，就循声赶过去，昂头寻觅目标。一旦发现，就将罗网小心个移过去，大约离知了1-2寸远时，冷陌生头盖下去，“药胡翅”个翅膀就会被牢牢粘垃罗网上。因为“药胡翅”两眼无光，阿拉又轻手轻脚，稍无声息，所以往往是三只手指捏田螺——十拿九稳，一扑就是一只， 用勿着多少辰光，阿拉个大口瓶中，就俘虏成群了。一次，有对知了正好垃拉交配，粘垃一道，阿拉一扑下去，捉了一双……

　　“药胡翅”雄个头大，身体黑，善鸣。小辰光，阿拉一般会把雌个“哑吧”放生，留下雄性个白相。最好白相个是比赛啥人个“药胡翅”叫得响、叫声长。一次，跟同学比赛，各拿一只“药胡翅”放垃右掌中，用力一握，“药胡翅”就会放声歌唱，大约我用力勿当，过脱一歇，手中个“药胡翅”勿叫了，任凭右手再哪能摇，再用另一只手拍，伊就是勿叫，而对方个“药胡翅”叫得老响，我急得松手查看，哪晓得迭只机灵鬼趁势飞走了，原来是装死，弄得我老呒没面子个。

　　“药胡翅”勿容易饲养，一般来讲往往养勿过夜。阿拉是白天拿伊放垃皮鞋盒中，里向放些柳叶条，夜里就用线扎牢伊，再拿伊放到室外个树枝头上，因为听讲伊拉要吮树汁，吸露水，　“药胡翅”也真是蛮娇生惯养、难服侍个。