小辰光要吃粽子必须自己动手，或等别人送，呒没第三种方法。

　　因为当年个糯米需要按计划供应，肉也需要凭票购买，所以当时每年吃粽子也算一桩大事，需要早早开始计划。阿拉屋里向包粽子个主角是我阿婆，伊辣辣一个月之前就开始跑米店，专门寻粒子圆个糯米，据说搿种糯米更糯更香。买回来个糯米还要细细挑选，混了里向个小石子侪要拣出来。

　　包粽子个前一天，阿婆一大清早就去菜场排队买肉，虽然买肉需凭票，但要选到满意个五花肉还是需要拼时间和体力，更是要讲一点点运气。买回来个肉切成方块，两指宽，肥瘦相间，再用酱油、黄酒、白糖做个酱料浸渍一整天。

　　第二天正式开始包粽子，阿婆坐辣弄堂里，椅子旁边面盆、锅子一大堆：有浸泡好个粽叶；有事先淘好沥干水个糯米；有酱好个五花肉；还有浸辣水里个赤豆……阿婆就像一个带队布阵个将军，娴熟地指挥搿些盘盘罐罐。三张粽叶围成一个“漏斗”，先放一半米，再放一块大肉，然后补米到“漏斗”口，用调羹压实，最后用大拇指和食指捏紧翘起来个粽叶，左一绕右一弯包牢边角，用粗棉线拦“腰”扎紧，一只三角粽就包好了，角儿尖尖，腰身婀娜。

　　讲起来，伊个辰光，大家最欢喜吃肉粽，但是，阿婆每次包粽子，肉粽数量是最少个，基本就是按照阿拉搿栋楼里向个人头计算，其余个糯米全部用来包赤豆粽和白米粽。先包好个肉粽先下锅，灶台浪放一只大号钢精锅，满满一锅粽子从午饭后开始煮，一直煮到夜饭前，整整四五个小时，整栋楼里侪是粽叶清香、肉香和米香，阿拉左一个深呼吸右一个深呼吸，享受先从嗅觉开始了。

　　肉粽煮好，阿婆会按楼里每家人口数量分送，然后煮第二锅赤豆粽和白米粽，搿锅粽子才是阿拉端午节个主食。连了一道个两只粽子是赤豆粽，呒没粽叶尾巴个是白米粽。赤豆粽和白米粽蘸绵白糖，轻轻咬一口，甜到心里向。对阿拉搿点小朋友来讲，搿天就是一年当中除脱春节过年之外最开心个一天。吃剩个粽子会被装进一个竹篮，挂在灶披间里，成了我家个早餐口粮，大约能吃一个礼拜左右。当然阿拉也会收到邻居家包个粽子，上海弄堂里个小囡侪是吃百家粽长大嗰。

　　长大出嫁后，婆家主要由公公操刀包粽子。看到一米八几嗰大男人围一条小花围裙，坐辣公房走道一侧，往粽叶里塞米加肉，我总觉得搿种景象很“违和”，连着好几年侪感觉勿习惯。勿过，辣辣婆家住个新村里，公公包出来个“小脚粽”相当出名，搿种“小脚粽”外观就像一只小脚，勿仅粽子内芯紧致，而且可以通过缠绕粽叶让粽子定型，勿需要用棉线捆扎，让许多大妈大婶汗颜。

　　公公搿手绝活据说是因为我老公小辰光眼热别人家个粽子，才下决心向隔壁宁波阿娘学嗰。公公也是宁波阿娘唯一一位学会出师，能独当一面个徒弟。可以讲，公公个拳拳爱子之心侪化辣辣一只只粽子里。公公学会搿门手艺以后，每逢端午节，新村里有人家要包粽子了侪会提前来咨询，还要请伊去现场指导。公公虽然忙忙碌碌，倒也整天乐乐呵呵，看起来被别人需要所获得个心理享受，还是超过了身体浪个辛劳。

　　再后来，儿子要出国留学，外婆和爷爷心疼外孙（孙子）辣国外吃不到欢喜吃个粽子，就想让我学。有了动力我学得飞快，试了两次就可以独立操作了，三角粽已经包得有模有样，就是小脚粽还不得要领，一烧就会散开来。即便如此，我还是自认为可以出师了，学会包三角粽已经足以让儿子辣异国他乡吃上粽子。

　　异国个粽子里包个是亲情和乡情，搿门手艺还是要传下去。