上海人侪晓得猪舌头也叫“门枪”“赚头”。葛末为啥有介许多讲法呢？

　　中国人向来节约，猪个头、脚、尾巴、内脏等等侪能做成美食，勿肯厾脱。搿一方面是讲究物尽其用，另外一方面也是追求新奇、享受美食，以猪舌头为例，自古以来就是阿拉台子浪个美味佳肴。

　　传说元朝末年，朱元璋破了张士诚个苏州城，到饭店请客摆酒。浓油赤酱个红烧猪舌头味道交关好。朱元璋问军师刘伯温是啥物事。刘伯温晓得朱元璋搿辰光已经有做皇帝个念头，为了避讳“猪”“朱”谐音，就聪明地回答：搿是门里一杆枪，叫“门枪”。从此以后，门枪个叫法就流传开来。

　　清末民初，已经勿需要避讳“朱”字了，但当时上海滩能经常到饭店吃饭嗰侪是生意人，交关生意人忌讳舌头个“舌”音，因为与“蚀”相近。饭店里搿只菜味道蛮好，名字勿吉利。结果有门槛精个饭店老板用当年刘伯温个办法改“舌（蚀）头”为“赚头”。“赚头”辣上海闲话里指赚到个铜钿、盈利。吃饭有“赚头”，客人听了开心，搿道菜依然畅销勿衰。

　　多讲一句，有种讲法“赚头”是从“缠头”转过来个。缠头是唐代对宴会浪表演歌舞者个犒赏。杜甫《即事》诗：“笑时花近眼，舞罢锦缠头。”后来又作为赠送青楼女子的财物的通称。陆游《梅花绝句》：“濯锦江边忆旧游，缠头百万醉青楼。”“缠头”“赚头”辣辣上海话里发音差勿多，“赚头”更加体面，所以勿用“缠头”用“赚头”。