上海闲话里有一些词语搭人体某部位搭界，比方“噱头”“蹩脚”搭仔“辣手”咾啥，侪老有个性色彩嗰。所谓“噱垃头浪，蹩垃脚里，辣手辣脚坏事体”，就是阿拉送拨搿排用卑劣手法蒙骗消费者个黑心商家一句“的的呱呱”（名副其实）个评价。

　　噱头，讲穿了就是“花板”（糊弄人），摆噱头也就是摆花板——黑心商家弄虚作假，明明是假冒伪劣“蹩脚货”（次货），却要“摆飙劲”（逞能），今朝“烂铅皮冒充克罗米”（以次充好），改日“阿胡卵冒充金刚钻”（以假乱真），辣辣大庭广众面前“神志无主混腔势”（蒙混过关）、“信口雌黄摆挖尔势”（耍滑头），叫侬“吃进”（吃亏、上当），让侬“挖塞”（郁闷、后悔）。

　　从词语构成来看，噱头属于附加，蹩脚属于动宾，而辣手则属于偏正。其实，与人体搭界个类似词语还有交关，比方动宾构成个“卸肩胛”（推卸责任）、“收骨头”（做规矩）、“牵头皮”（被人数落）、“触心境”（触动心事而不悦），以及偏正构成的“夜壶脸”（脏面孔）、“赖极皮”（耍赖）等等，侪是沪语当中既生动形象、又琅琅上口个“看家话”（如镇宅之宝）。

　　上海闲话里还有一句“夫妻老婆店”，容易被人误解。老底子像搿种弄堂口烟纸店规模个小店、小作坊，统统可以叫夫妻老婆店。有人问我，迭个说法好像勿合常规：一爿店一对夫妻再加老婆，阿会得是二奶？但老上海人侪搿能叫，大家约定俗成、勿以为怪，对口伐？我讲勿见得。因为夫妻老婆店里个“婆”字，或许应该写作“孵”。夫妻老孵店，是指夫妻两个人，老是“孵”辣店里向做小生意。