晚来天欲雪， 家家腌腊肉；

　　能饮一杯无？顿顿有腊肉。

　　小雪过后，天气开始冷了，老底子迭个辰光，每家人家侪要买眼肉，动手做香肠、腊肉。

　　阿拉老家绍兴乡下头欢喜用酱油腌鸡鸭鱼肉，晒干后黑铁墨脱，不过，蒸好仔切成片看上去倒是浓油赤酱，酱香里带一眼甜，是过老酒个好物事。

　　过年前头一段辰光里，一串串挂了竹竿浪向吹得硬梆梆个香肠、腊肉、整鸡、整鸭，常常弄得阿拉迭种小馋痨胚想入非非……

　　不过，有辰光也会发生点不开心个事体。

　　从前住房紧张，三家人家住了一套房子里，过道、卫生间、灶披间合用。有一天早浪向起来，发觉挂了过道里个一块酱肉勿见脱了。迭种情况，就算人家蒸好仔摆勒台子浪向，阿拉也呒末办法证明迭块肉就是阿拉呃，想想真是蛮气人个！

　　现在倒是可以顿顿吃腊肉、酱肉了，不过，身体偏偏高勿成低勿就了。搿末，比较好个办法就是用腊肉做小菜搭头：比方讲，蒸腊肉辰光下头摆块豆腐，吸脱眼油水；再比方讲，炒西兰花辰光，摆几片蒸熟腊肉进去，可以吊吊鲜头，配配颜色。

　　时代勿同了，肉个地位也勿同了。