离开部队五十年快了，当年个“军用品”就剩针线包。

　　针线包只有巴掌大小，是用草绿色细帆布做个，针线包个包盖头呈三角形，角顶端缝仔一根手指宽，半尺长个白纱条，勿用个辰光，用纱条绕起来就勿会松开。我是从学堂走进军营个，从来呒没做过针线生活。再讲刚刚到部队，发到手里个物事侪是新个，呒没啥物事要缝缝补补，所以搿只针线包就随手塞到了抽屉角落里。

　　参军当年个冬天，部队到山沟沟里野营训练。山上到处侪是齐腰高个茅草，草丛里向还有野枣树。训练个辰光，一勿当心棉衣就会被枣树上个尖刺扯破，露出棉絮。我因为呒没带针线包，勿好缝补，就向卫生员要点橡皮膏，从里朝外粘牢。当时还能对付，但经勿住训练辰光摸爬滚打，一歇歇又豁开了。后来还是班长拿出针线包，一针一针帮我补好。不过，真正让我寻回针线包个是第二年夏天发生个事体。

　　搿天中午，全连突然紧急结合，全副武装急行军，到几十里外一个小山村执行任务。伊个辰光有“兵勿兵，八十斤”个讲法，就是讲每个战士个背包加上武器弹药以及各种器械至少有八十斤重。我从小到大，从来呒没背过介重个物事，走过介长个路，而且侪是高高低低，弯弯曲曲个山路，要勿是一路上老同志勿断鼓励和帮助，恐怕蛮难坚持个。

　　到达目的地天已经黑了，我吃力得几乎瘫倒。吃过夜饭，洗漱完毕，连长就让大家早点休息，我摊开草席倒头就睏。搿个辰光，才觉着脚底板火烤一样痛。睏梦头里，我突然觉得脚上一痛，像被针扎了一记。张开眼睛一看，有只手电筒照牢我个脚，原来是指导员来了。伊看见我醒了，就凑近我耳朵轻轻讲：“侬脚上打泡了，熬一熬，我来挑破。”

　　原来，指导员查夜个辰光，发觉我脚底板磨出了泡，就悄悄帮我处理。之后，指导员收起针线包，拿起手电筒继续查夜去了。茅草屋里静悄悄，我只看见指导员手电筒个光柱，又辣辣其他战友个脚上晃来晃去。搿个辰光，我才发觉小小针线包里，勿仅有针头线脑，还有让人难以忘怀个暖意。

　　后来，我辣辣老同志个帮助下头，慢慢学会了钉被头，补衣裳，也学会了托袜底，换衣领。我从勿会穿针引线，变成能缝能补。针线包，勿仅帮助我克服生活当中个种种困难，也使我记牢革命军人艰苦奋斗个光荣传统。辣辣部队六年，我无论到啥地方，也无论每次调防要厾脱多少物事，搿只针线包却是无论如何也勿会掼脱个。

　　现在生活水平提高了，搿只针线包或许已经派勿上用场，之所以留到现在，是因为针线包里有当年军营生活个激情；有挥之不去个怀念。