记忆里，老早底马路浪烟纸店蛮多个。我屋里住辣淮海路大安里，东面横马路是嵩山路，西面横马路是黄陂路。勿足一百米个马路，就有得两爿烟纸店。马路对过个弄堂口也有得一爿烟纸店。

　　烟纸店里除脱卖香烟老酒、针头线脑咾啥，还卖一些小朋友欢喜吃个小吃场，像盐津枣、弹子糖、甘草陈皮咾啥，只要一两分洋钿就可以买一包。小朋友从姆妈搿搭讨来几分洋钿零用钱，侪会得到烟纸店买一包小零食吃吃。

　　记得搿点小零食里最经吃个就是盐津枣，拿一粒盐津枣放辣嘴巴里咪咪，有眼咸、有眼甜，还有一眼酸，邪气有味道个。一包盐津枣，我唔没数过，毛估估至少有得百把粒吧，也是佬实惠个。

　　伊个辰光，大多数小朋友侪已经懂得“共享”个道理啦，啥人买仔盐津枣，其他自家要好个小朋友侪会分到几粒，大家一道吃，一道白相，真个其乐融融。