俗话说女婿是半个儿子，我看未必。女婿有自己个爷娘，哪能就会变成你丈人老头个儿子呢？谓予不信，且听老夫慢慢道来。

　　老夫只有一个女儿，邪气听老爸个闲话。老爸叫伊读书个辰光就认认真真读书，勿可以轧朋友，伊就认真读书，大学四年，年年拿头等奖学金。

　　毕业参加工作，开头几年要学习工作技能，适应工作环境，呒没心思考虑轧朋友个事体。等到工作驾轻就熟了，年纪也接近三十岁了，乃么有点急了，总算要考虑轧朋友个事体。毕竟几个要好同学个小孩侪已经好几岁了。

　　好勿容易寻到男朋友，带到屋里来，让爷娘把把关。男朋友看起来倒蛮老实个，长相还算端正，接下来就是谈婚论嫁，忙忙碌碌几个月，国庆节总算办好喜事。

　　有一趟，女儿女婿邀阿拉老夫妻出去白相，公园里女婿去上厕所，过脱一歇歇，我也有点内急，就循着小路去厕所，啥人晓得，突然看见女婿辣辣厕所外角落里抽香烟，伊也看到了我，连忙厾脱烟头，两个人侪有点尴尬。

　　从头一趟见面开始，我一直呒没看到过女婿抽烟，搿能一记，我心里觉得勿适宜。辣辣饭店里吃饭个辰光，我邪气认真地对女婿讲：“小傅，吃香烟有百害无一利，侬阿好拿香烟戒脱！”结果呒没想到，女婿回答我：“老爸，迭个勿可能，几十年了，哪能是随便能够戒脱个！”我无言……

　　后来女儿养了个外孙女，邪气讨人欢喜。办满月酒个辰光，我半开玩笑半认真地对女婿讲：“小傅啊，现在国家开放，可以生二胎了，等宝宝大一点了，阿拉再养一个小囝，好口伐？”女婿爽气回答：“老爸，搿个当然！”我又对伊讲：“小傅啊，老爸跟侬商量，第一个宝宝姓傅，葛末，第二个宝宝就跟伊个姆妈姓，姓柳，好伐？”女婿听我讲到这里，吃了一惊，眼睛瞪得佬大，急吼吼回答：“老爸，迭个是勿可能个!”我又一次无言……