青浦，伊是个水乡泽国，上海个文化源头。早垃拉六千年前，上海先民就垃现在个青浦白鹤，唐宋青龙镇个吴淞江边，捕鱼捉蟹，繁衍生息。当年，上海个吴淞江江面宽阔，水势浩瀚，上海先民发明了一种专门用于江海捕鱼蟹个工具，叫做“沪”。唐代个文人陆龟蒙曾垃拉《渔具诗》序言中讲到：“列竹于海曰沪，吴之沪渎是也”。“沪，吴人今谓之簖”。

　　说起蟹簖搭上海地名个历史，还有搿样一个传奇个故事：据说当年汉高祖刘邦跟项羽，垃拉江东水网地带几次交战，屡屡输脱，伤亡邪气大。刘邦一面抓紧军队操练，一面跟手下谋士张良谋划，要伊开足脑筋，设法以寡胜多，以智取胜，打败项羽个兵将。

　　一日，张良带着积聚垃拉心头个烦恼，独家头来到了吴淞江边。突然间，伊远远看见一个老渔翁，挑仔一付竹篓，正朝伊搿边兴冲冲个走来。张良上前一看，原来，前后两只装得满满个篓子里，竟然是清一色鲜蹦活爬个清水大闸蟹。张良啧啧称赞说：“好蟹，好蟹，侬一家头哪能捉得到介多蟹？”

　　老渔翁一言勿发，闷声勿响个带仔张良来到吴淞江边，指着一排排竹编个蟹簖，自豪个讲：“侬看介许多大闸蟹，随着吴淞江潮水，通过我布下个竹编蟹簖，左转右转，一路朝里爬行。到后来，蟹越爬越进，只进难出。我是来多少，捉多少，呒没一只漏网。蟹簖叫我省省力力，我只要用‘海斗’到‘蟹簖’中捞就是了。迭种战术叫做‘瓮中捉鳖’”。

　　“啊，原来是迭能样子。好，邪气好！”张良经过老渔翁一番话点拨，兴奋个跳了起来。心中暗自得意，迭个勿是我冥思苦想琢磨，以逸待劳、以寡胜多个制胜办法吗？张良立马谢别了老渔翁，回到了军营，拿起了纸笔，按照蟹簖捉蟹个原理，点点画画，修修改改，连夜炮制出一幅用兵制胜个“八卦阵图”。伊立马就交拨刘邦审阅，解释了自己哪能操练部队，哪能布局兵阵个计策。

　　说来也巧，垃拉刘邦布阵操练成熟个辰光，正巧是项羽兴兵进攻个日脚。迭辰光，汉军个士兵，虽然人数勿多，但是经过严格训练，人人遵守纪律，个个各就各位。伊拉一歇歇虚张声势，诱敌深入；一歇歇声东击西，各个击破。楚军闯入了张良布下个迷魂阵。楚军就像吴淞江个大闸蟹爬进蟹簖搿能，左转右转，越闯越深，晕头转向，好进难出。到后来，凡是闯入八卦阵个，统统被汉军消灭清爽。即使楚军士兵额角头高，呒没进入阵地个，全都喊爹叫娘抱头鼠窜。

　　后来，上海先民把迭种充满智慧个蟹簖，命名为“沪”，作为上海个地名。伊来源于上海先民用绳编列竹棚，插垃水中个涨沙上，向两岸张开个蟹簖。伊可以潮上倒伏，潮退立起。让随潮而入个鱼蟹，受阻于竹栅，渔家能够轻易个获得丰收。迭种利用潮汐涨落原理个蟹簖，使捕捉鱼蟹个方法交关巧妙。伊体现出上海先民个聪明才华跟智慧思维，迭是当今上海城市精神个文化基因跟历史源头，应该成为上海个非物质文化遗产。