上海人躺着中枪。“躺着中枪”是网络里流传开来个时新闲话，意思是无端受到别人家个议论、调侃、甚至攻击。事体是掰能介个：国庆节上海申花足球队主场对江苏舜天，双方球迷辣比赛开打前就辣看台上大家来骂山门。吵相骂呒没好闲话，骂猪骂狗骂鸡。某体育网站正辣作球赛直播，某讲解员辣试音个辰光就一口气讲了：“江苏队1号球员江苏×、2号球员江苏×、3号球员江苏×、某号球员黎巴嫩江苏×……”拿客队骂成了小狗小猫。想勿到搿一长段试音被播出去了，就此闯祸。舜天俱乐部赛后要追责，江苏球迷要讨说法，各地声援者众多。央视“东方时空”也严厉批评搿样个地域歧视言行。某网站马上对某讲解员停职调查，查实后对相关人员开除，还诚恳对受害一方赔礼道歉。事体进展很快，平息得也勿慢。因为闯祸胚是上海人，网上拍砖个就拿上海人当成了出气包。上海人乃末躺着也中了枪。冤枉官司。

　　旧上海十里洋场，容勿得一个土字。土包子、乡下人、外地人亨八冷打是小瘪三。勿但“瘪”，而且“小”。到上海来谋生个江苏人只要是长江北面个人，就贬称伊拉为江北人。长江南面个人勿称伊拉为江南人，只以地名相呼：丹阳人、常州人、无锡人、常熟人、苏州人。旧上海人伊个辰光还勿与“江北人”结亲通婚。好像纳了一个苏北人做媳妇、招了一个苏北人做女婿就辱没了家风。解放以后，搿种地域歧视渐渐消灭。到了改革开放之后，国门大开，海纳百川，勿但天南地北个人到上海来发展，连外国人，勿管白个黑个红个都游到黄浦江里来加盟上海滩了。地域歧视更加被冲得稀里哗啦。上海人有搿种地域偏见个只是上三代个古稀老人，上二代个退休老人也勿再看低看贬外地人、勿再看高看重外国人哉。某讲解员是下一代人，想勿到伊脑子里还屯积着旧上海个古董念头，蛮滑稽个。好辣伊已经认错道歉，还是一个可以教育好个乖小囡。

　　上海滑稽戏里个经典大戏《七十二家房客》和传统名段《十三个人叉麻将》中，南腔北调，噱头百出。小苏州看到老宁波触气，老广东看到小苏北惹气。就是同一个上海人里向，川沙人碰到崇明人还会话勿投机。戏文里个搿点事体辣今日上海城里已经烟消云散了。大家走出弄堂搬进了小区。勿管侬开口讲阿里一个地方个家乡闲话，大家攀谈来攀谈去只有一个主题：和谐平安、幸福家园。新个上海屋檐下，可以写出新篇七十二家房客、新版十三个人广场舞，是？