前几天去超巿里买牛奶，顺便到旁边卖冷饮个柜台兜了一圈，发现现在冷饮品种真个是多，足足占了好几只大冰柜。不由得回想起阿拉小辰光去食品店里买冷饮个事体。

　　当时一家蛮大个食品店里也只有一只小冰柜负责卖冷饮，总共只有棒冰、雪糕、冰砖等四五只品种，侪是本地厂家生产个品牌。再加上当时大多数人家经济条件侪不好，一般能买几根雪糕、棒冰解解馋就很不错啦，假使能卖一块简装冰砖尝尝，阿拉就觉得像“过节”一样。

　　其实，伊个辰光家家户户防暑降温个主要食品，不是食品店里卖个冷饮，而是从附近有冷气间个工厂或文化馆泡来个冰水。可以讲，拎保温瓶泡冰水是当时大多数人家每天侪要做个事体。

　　阿拉屋里就住辣十六铺码头旁边，不远就有一家供应冰水个冷气间，附近居民借光不少。不过这家冷气间个大缺点——开放不定时。啥辰光对外头卖冰水不预先讲，有辰光突然就开始放冰水了，放了一歇又不放了，让人心里有点吃勿不准。

　　不过，我晓得迭家冷气间有一个红鼻头门卫，每天下班以后侪要去冷气间对面一家酒摊吃老酒，就算好辰光，到酒摊浪向伊打听第二天啥辰光供应冰水。不过迭个老头也相当滑头，消息真真假假，有辰光听了伊个消息，大太阳下头排了半天队，结果扑了个空，阿拉也只好辣辣背后头骂脱伊一顿。

　　除了冷气间，可以泡冰水个地方还有做冷饮个街道工厂、冷饮批发部、卖刨冰个食品店等，反正只要有制冷设备，一般侪会做卖冰水个生意。假使离得最近个冷气间泡不到冰水，阿拉就会四周围去打听，附近还有啥地方有冰水供应。一有消息，弄堂里一帮小赤佬就穿仔平脚裤、木拖鞋，人手一只保温瓶，浩浩荡荡一道走过去。现在回想起来，还是觉得相当有意思。

　　泡到冰水以后，一道来个小朋友就好像打了鸡血一样，侪会兴奋起来，大家一路走一路哼唱欢喜个歌曲。

　　冰水泡回来以后，就是屋里向小姑娘个事体了，伊拉会根据屋里向个“库存”，做出勿一样个“冲泡原汁”。最大路个“原汁”是土制“酸梅汤”，其实就是白糖加醋，吃起来酸酸甜甜；还有就是烧一锅绿豆汤，做冰冻绿豆汤；条件再好一点，会去买一块光明牌简装冰砖，冲一壶冰冻奶油饮料。

　　夜里向辣辣弄堂里乘风凉个辰光，家家人家一保温瓶冰水，一大杯自制“原汁”。女主人还会泡一杯自制冷饮水，客气请隔壁人家尝尝味道。不同个“原汁”往往反映出不同个家庭条件。

　　不过，阿拉搿点小赤佬不会去管大人个事体，侪会聚到路灯下头，一面打牌，一面商量第二天到啥地方去泡冰水。一个大热天，好像就辣辣天天泡冰水个乐趣中，老快就过脱了。