路边摆个摊，赚钱赚心情；

　　一对白兰花，挂上侬衣襟。

　　蛮好白相个，电影里、电视剧里卖花个，通常侪叫阿香，上身穿花布衣裳，下身穿阔脚长裤，头浪梳两根小辫子，一只篮头挟了手臂把里。有辰光，阿香还是潜伏人员，为主人公传张纸条，带句闲话老啥。

　　而生活当中，交关卖花呃侪是阿婆。比方讲，搿些辰光，地铁口、商场门口，常常会有卖花阿婆，伊拉长相侪差勿多，头发灰驳落拓，皮肤晒得黑幽幽个，背有点郈……

　　阿婆坐了小矮凳浪，脚馒头前头摆只篮头，里向侪是白兰花、茉莉花。有种阿婆活络点，会招呼几声，叫牢人家看一看，带朵花去；有种阿婆闷声勿响，收钞票、找零头，大部分辰光就低仔头做生活:白兰花长夭夭里，两朵或者三朵用铅丝扎起来，铅丝弯成一只环，可以挂了钮扣浪向；茉莉花小勒一笃笃，就一朵朵串起来，当手环……

　　前两天有人辣辣自媒体浪向讲，阿婆出来卖花勿是为了钞票，只是想寻人讲讲闲话，所以，阿婆常常勿收钞票。哎，侬导向有问题好口伐？介热天出来做生意，勿是为了赚钞票？卖花赚钞票又不坍台！

　　搿倒让我想起另外一桩事体来了。

　　有趟仔也是一个大热天，我走进办公室，看到台子浪向有两朵串好个白兰花，呆了一呆。

　　旁边一个小姑娘开心得勿得了：阿拉领导今朝路过地铁口，看到一个阿婆辣辣卖花，伊一记头捺篮头里卖剩个花侪买下来浪，喏，每个人台子浪侪有。

　　领导是个上海男人，平常闲话勿多，不过，讲一句是一句。

　　【沪语解释】

　　手臂把：手臂。

　　脚馒头：膝盖。

　　叫牢：叫住。

　　长夭夭里：细长的样子。

　　小勒一笃笃：小得一点点。

　　坍台：丢面子。

　　一记头：一下子。