从黄梅天到盛夏个三伏，热浪滚滚。夏天个水果吃食多得勿得了，啥个水蜜桃啊、黄金瓜啊、石榴荔枝西瓜啊等等，但有一样东西人们大概记勿起来了，伊就是白糖梅子。

　　梅子也叫青梅，勿是观赏梅花结个籽，像红梅、腊梅、绿梅，而是灌木梅树结个果实，辣辣黄梅季节成熟采摘。

　　上海人有句老话，叫做“勿要白糖梅子卖青”。意思是勿要浪费青春，少壮勿努力，老大徒伤悲。还有“黄梅勿落青梅落”。《三国演义》里也有“望梅止渴”个典故，宋代个词人蒋捷有两句词，叫“梅子流酸溅齿牙，芭蕉分绿上窗纱”（《一剪梅·舟过吴江》）。迭个说明梅子辣辣阿拉生活当中也占了一席之地。

　　眼门前大家晓得个梅子，一般只是话梅、青梅酒、糖渍青梅、酸梅汤等等，辣辣阿拉小辰光，每当热天价辣小街浪、弄堂口，经常有叫卖白糖梅子个摊头。记得我屋里对过弄堂里就有一个专门炒卖白糖梅子个小贩。迭个小贩平常日脚摆水果摊，辣辣西瓜还呒没正式上市前，伊就炒白糖梅子卖。

　　每当迭个辰光，伊就辣弄堂口生起一只大个铁皮炉子，上头搁一只邪气大个铁锅子。炉子烧旺，拿白砂糖倒进锅里，加点水，白糖就烊脱了，再拿竹筐里汏清爽个梅子倒进去，用长木铲不停搅拌，勿多一歇，白糖干了，统统侪沾了梅子浪向，一粒粒梅子看起来就像小雪球，玲珑可爱，然后盛起来，放进白颜色个小盆子里。

　　一锅子白糖梅子烧好以后，伊就开始叫卖：“阿要买白糖梅子啦——”迭个辰光小小人（大人也有）总要围成半圈，看伊炒梅子个表演，嘴巴里感觉酸溜溜个，馋唾水出来也只好往肚皮里咽。搿也算老早子街头一小景。

　　有辰光也有小贩批一点白糖梅子，放了扁扁个竹篮里，盖上白布，穿街走巷叫卖：“白糖——梅子”真个，白糖梅子咬一口，甜甜酸酸，口里生津，齿颊留香。现在看勿见了，白糖梅子也呒没了。只不过旧时个记忆还辣辣，勿会忘记脱。

　　据医学常识介绍讲，大热天吃一眼酸个物事有益处，而青梅具有排毒养颜、除斑祛痘、清肝明目等功效，搿搭附带提一提，也算搭白糖梅子点个赞：久违了。