春风送暖，万物复苏，乡下头个田野、沟边、河岸浪，一丛丛个马兰头便会舒展开两片狭长碧绿个叶片，蓬蓬勃勃个生长出来。

　　据美食家讲，马兰头含有丰富个矿物质和17种以上个氨基酸。而据中医讲，马兰头还有清热、解毒、明目、止血、利尿个功效，可以讲，马兰头是食物中个一宝。所以一到春天，交关上海人侪喜欢买来时鲜个马兰头，用开水氽过后斩碎，告香豆腐干一拌，浇点麻油加点盐、糖，就是一道乓乓响个美食。

　　勿过，辣辣老底子阿拉屋里向吃个马兰头勿是买嗰，侪是阿拉几个小囡到野地里去挑来嗰。上世纪五六十年代，我住辣鞍山路上个工人新村里，搿辰光工人新村周围还有勿少农田搭子小河浜。春天里，弄堂里个小朋友就会辣辣礼拜天约了一道到野地里或者河浜边浪去挑马兰头。阿拉一面挑还一面比赛，看啥人挑得多挑得清爽，就是看啥人挑个马兰头是呒没黄叶、老叶，勿带硬梗个，回去勿要再讨手脚拣老啥，直接汏清爽就可以烧来吃。当然，像阿拉搿些小囡辣辣挑马兰头个辰光少勿了还要轧了一道白相。假使讲，阿拉辣辣一个地方挑了几趟，觉着呒没啥好白相了，就会出花头调地方。搿个辰光就会郜爷娘说谎：“附近侪拨人家挑光了，阿拉要到远一眼个四平路、赤峰路或五角场去挑。”得到爷娘同意后，阿拉又会成群结队个到搿几个地方个野地里去挑马兰头。到了搿几个地方，真是开心啊，阿拉一面挑马兰头，一面还会赤脚到水沟里去捉泥鳅，摸蟛蜞，还会拗一根树枝当枪，爬到老早国民党军队留下来个碉堡浪向振臂高呼：“为了新中国，前进！”等到白相好了，浑身上下也就呒没一块清爽个地方，凭搿副卖相回到屋里，少勿脱要拨爷娘臭骂一顿吃几只毛栗子，但爷娘看到阿拉挑回来个满满一篮头个马兰头，肚皮里个气阿就消了。

　　由于当年缺衣少食，爷娘拿阿拉挑回来个马兰头勿仅仅要做菜，还会拿伊当饭。就是拿马兰头斩碎后拌辣面粉里摊成饼，或者包辣面团里做成菜团子。爷娘是想尽办法要让阿拉搿些正辣辣长发头浪向个小囡吃饱肚皮，真是可怜天下父母心啊。现在好了，改革开放后经济发展了，人民群众个生活富裕了，大家吃穿勿愁，挑马兰头阿勿是为了解决温饱，倒是成了农家乐里向一档供大家休闲娱乐个时髦活动，而吃马兰头更是成了大家追求绿色个时尚。真是时代勿同了，马兰头个身价也勿一样了。