春天有交关好吃个时鲜菜，菜尖就是其中之一。

　　所谓菜尖，就是青菜辣即将抽薹开花个辰光长出来个一小截嫩头。因为青菜抽薹必须经过低温酝酿，搭仔足够阳光，热天忒热，冷天忒冷，侪呒没办法叫伊抽芽开花。等到春暖花开辰光，伊又一下子蹿得老高，开出黄花来了，长得老了，吃口也就推板交关。

　　今年冬天雨水多，菜尖勿是长勿大就是烂辣地里，所以价钿比往年贵一眼。要寻着比较好吃个菜尖也是有窍开嗰，要拣身材矮矮胖胖、叶子比较厚、菜梗又是碧绿生青嗰。从前勿晓得，菜尖还有正副个讲法——菜心当中长出来个一根菜尖是正，旁边蹿出来个分叉就是副。正菜尖粗壮一眼，副菜尖比较单薄，吃口也勿一样。

　　至于吃法，嫩菜尖通常就是生炒了吃。汏清爽沥干后，热锅冷油，生炒片刻，摆盐调味就可以出锅装盘，摆到台面浪碧绿生青，软软糯糯，是原汁原味个春天味道。

　　菜尖也可以炒菜饭，汏好切碎，油里煸透，再摆蒸熟咸肉与米饭一道焖，廿分钟就可以了。上礼拜从西班牙回来，胃拨伊拉个夹生海鲜饭弄得六神无主，还是用一镬子菜尖咸酸饭摆平嗰。