老早仔，我住辣浦东离市区最近个洋泾古镇浪，经常能看到走街串巷个手艺人，伊拉个手艺各不相同：补锅、补碗、刻字、磨刀、修钢笔、修棕棚，但是伊拉招徕生意个套路倒是差勿多，侪是边走边吆喝，各种吆喝声给弄堂增添了勿少生气和情趣。

　　记得有一次我正辣屋里做家务，听到门外有人喊：“啥人屋里需要磨刀，快点拿出来。磨刀人来了！”想起前几天姆妈讲屋里个菜刀钝脱了，我马上跑到灶披间拿菜刀寻了出来，打算拿出去请磨刀人磨一磨。出门一看，发现迭个磨刀人勿是我想象中个中年男性，而是一个看起来三十几岁个阿姐。迭个辰光，伊已经接到生意了，正辣辣磨一把剪刀，弄堂里几个小把戏围了旁边看稀奇。

　　我看伊做生活邪气认真，动作干净利落。一歇歇工夫，剪刀磨好了，搿位阿姐又拿出一块毛巾，拿剪刀揩得干干净净。接下去，伊又开始替我磨菜刀，刀片辣磨刀石浪滑动，伊一面磨一面往刀浪向淋清水。过脱一歇，伊就用手指辣刀刃浪向轻轻刮一几，又眯起眼睛看刀锋。如此几次，眼看刀锋浪向泛起一道白线，明显锋利起来。磨完刀，伊又拿松动个刀柄重新箍紧，用布揩干，才递到我手里。等我拿菜刀放回灶披间，女性嗓音个婉转吆喝声又传进我耳朵。

　　其实，大多数情况下头，磨刀师傅以男性为主，因为磨刀勿但是技术活，也是体力活。伊拉个全套“行头”侪围绕一条长凳，长凳一头固定两块磨刀石，一块用于粗磨，一块用于细磨，凳腿浪还绑一只装水个铁罐。长凳另一头绑着坐垫，还挂了一个篮子或一只箱子，里向有一眼简单工具：榔头、钢铲、毛刷、揩布等等。伊拉一般是定期而来，辰光勿会隔老长，到辰光家家户户侪会拿各种需要磨个刀拿出来，尤其是春节之前。磨好一家，又去另一家，勿经意间磨刀人就成了弄堂里一道流动个“风景”。经伊拉手磨好个刀，基本浪可以用勿少辰光。

　　时至今日，交关日常生活用品个质地与当年相比侪有了极大提高，早年勿少行当因产品技术工艺改进搭仔市民生活习惯个改变，逐渐退出了历史舞台。以菜刀为例，早年菜刀主要用质地略次个铁料制作，只有刀锋部分采用钢料，也就是所谓“好钢用在刀刃上”，现在个菜刀一般全用高品质钢制造，勿仅持久锋利，即便偶尔需要磨一下，也有磨刀棒之类个“小玩意”可用，走街串巷个磨刀生意只能成为埃个年代一个交关难忘个记忆了。