上世纪50年代读小学，下半天三四点钟，感觉肚皮里向空落落，弄堂里往往就会响起“哆哆米饭饼”个叫卖声。声音刮辣松脆，带有广东口音。很快就可以看到一群“小把戏”（小孩）从屋里向冲出来，手里侪拿了“铅角子”（分币），一窝蜂去寻叫卖个小贩。米饭饼一摞摞放辣竹头编成个背篓里，小巧洁白，晶莹蓬松，上面还有一个鲜艳个红印，吃口香甜糯软，还有一点点米酒个香气，阿拉搿点小朋友侪邪气欢喜。米饭饼价钱勿贵，一分洋钿一只，生意好得勿得了。

　　现在，搿种蒸煮制作个广式米饭饼已经勿大看到了，只有一眼港式餐厅里还有供应。市面浪向摆摊卖个米饭饼大多数侪是苏北特色嗰，采用烘烤方式制作。制作辰光，平底铁锅放辣煤炉上面，锅底当中凹进去一只碗口大小个孔洞，洞里放满水，放过酵母个米糊下锅，摊成圆饼，马上盖好锅盖，开始烘烤，孔洞里个水受热变成蒸汽。出锅个米饭饼正面雪白暄松，反面有点焦黄。拿一根刚出油锅个油条，对折，再用两块米饭饼包起来。咬一口，米饼松软，油条香脆，味道邪气好。

　　阿拉屋里隔条马路有一个小菜场，最近里向开了一家做广式米饭饼个小铺子，老板是夫妻两家头。伊拉做个饼是有馅嗰，包括豆沙、枣泥、核桃、黑洋酥等几种，饼个大小比七宝老街个米糕大一眼，交关人吃过以后就变成了回头客，老清老早就有人排队，勿到十点钟就买光了。可见，传统食品也可以创新出新口味。