到杭州去白相，一碗莼菜汤总归要吃嗰。

　　莼菜有多少好吃呢？《晋书·张翰传》里记了一个故事：有个人叫张翰，官做到大司马，当时相当于兵马大元帅，现在讲起来，就是武装部队总司令。勿过，伊好像也呒没哪能拿迭个官当桩事体。因为有天仔伊立辣秋风里，辣末生头就想起自家家乡个好吃物事了：比方讲莼菜，鲈鱼老啥。

　　侬覅以为伊想想就算了，伊是马上辞脱总司令职务，直接回转去了。理由也石刮铁硬：人生贵得适志，何能羁官数千里以要名爵乎？搿句闲话大约模个意思就是：人生难得有好想法，就要号扫去付诸行动，哪能可以被千里之外个名位利益绑牢呢？

　　做人做到迭能，是真潇洒。

　　莼菜清淡，要烧好一碗鲜香个莼菜汤，还需要配一眼熟火腿丝、熟鸡丝、熟鸡油搭仔适量高汤。先拿新鲜莼菜摆辣开水里焯一焯，再捞出来沥干，盛了汤碗里；高汤烧开，合好咸淡，倒进莼菜碗里，熟鸡丝火腿丝放下去，淋稍许熟鸡油就好了。

　　也可以烧莼菜河鲫鱼汤。河鲫鱼烧好以后，拿焯过水个莼菜放下去，稍许滚一滚可以了。