过街楼是阿拉迭条弄堂口个上面个楼层，我小辰光住垃拉静安区个万春街87弄过街楼楼浪向。楼底下是弄堂出入口，通行行人。左边是个杂货店，右边是个酱油店。

　　万春街，一头连牢了康定路（曹家渡——延平路）；一头连牢了万航渡路（静安寺——武定路）。其实，老里八早万春街名字叫金司徒庙，“文化大革命”破“四旧”，拿庙砸个稀巴烂。改啥个名字好呢？考虑来考虑去，对了，要拿迭个地方变得一年四季是春天，路名就改成了万春街，寓意是侪沐浴垃拉春天里，就是万年如春。

　　从阿拉过街楼开始，到弄堂底浪向，一共拢总有26号。特别是8号里，就住了蔡家、王家、蒋家、俞家等好几家人家。阿拉过街楼个房子，住拉前头一间，只有7个平方，蹲6个人；后头一间5个平方蹲7个人。夜里向，统统侪要打地铺睏觉。后来后头一间人家因为支内，一家门侪迁到四川去了。临走个辰光，伊拉对阿拉爷娘讲，伊拉迭间房子送拨阿拉，但是要付眼钞票。阿拉爷娘就糊里糊涂拿30块钞票拨了伊，结果迭桩事体拨房管所晓得仔，乃末勿来三，讲勿好自说自话个。后首来阿拉爷娘横讲竖讲，总算办手续同意了。

　　最开心个事体，从此以后阿拉兄弟姐妹，每人侪有了自己个眠床！一天阿拉阿伯【宁波人称爸爸叫阿伯】回到屋里，开心煞了！伊对阿拉几个小鬼头讲，阿伯去买一眼眼木头，帮搭两只阁楼，就可以一人一只床了。但木头紧缺，阿伯动脑筋东拆西拆，利用休息日脚，搭造了两只阁楼。阿拉兄弟姐妹，睏觉一人一床，好开心啊。

　　最扎台型个事体，是1979年阿拉阿伯拨拉评为先进工作者，单位里奖励了一张好买20寸电视机个票子。阿拉几个小鬼头，屁颠屁颠个跟了爸爸去电视机厂个门市部去“领”回来。呒没地方放，乃未只好放到碗柜浪，电视机摆拉碗柜浪，面对着窗口，窗口正好对牢弄堂，一放电视，全弄堂个人侪像接龙一样，排队看，迭桩事体哦，是阿拉住垃过街楼最挺刮个事体！

　　最尴尬个事体，是早浪向，天蒙蒙亮迭个辰光，正是阿拉几个小鬼头要睏觉个辰光，“马桶拎出来，勿拎出来，勿来了！”每天倒马桶，因为要放置一条弄堂个马桶，所以，要选择宽阔地方，阿拉过街楼“光荣”选着！每天，一条弄堂，设两个倒马桶个点：当中设一个点；阿拉过街楼设一个点。倒马桶阿姨一面喊一面倒马桶。打开马桶盖头，臭气直往过街楼地板裂缝中窜。乃末，阿拉几个小鬼头，只好乖乖个起来了。

　　最讨厌个事体，是日里向要拖地板，一勿当心，拿拖地板个一盆水倒翻，水的粒笃落漏下去了。乃末好了，下头人家一塌糊涂。阿拉下面迭个摆小人书摊个人家，哇啦哇啦乱叫：“哎呀，书弄湿脱了！”迭个性命交关，人家摆摊头，是为了混一口饭吃吃！迭个事体哪能办？寻到了阿拉爷娘，阿拉爷娘只好赔钞票。迭个辰光，木头老紧张个，好几次，地板坏脱了，报修理，修理工勿来修，牵丝扳藤终于来修了，却弄点旧铁皮，打个补丁了事。一天早浪向，我一起来，一只脚，一记头地板踏断，一条腿，一半垃拉楼浪，一半荡垃拉地板下面，乃末尴尬，我心中老翁肿个。

　　哎呀，迭个过街楼，阿拉住过廿多年，事体多来兮！