很长一段时间里，“大团结”（10元面额人民币）勿仅代表了最大个票面，也代表了生活水平。1970年代，一个青年工人，一个月个工资亨八冷打三十六块，还勿足四张“大团结”，扣除生活费，扣除上缴拨爷娘个家用，再扣除储蓄，如果手里头还剩下一张“大团结”，一定是风光了邪气。“大团结”最风光个时代，也正好是“的确凉”（涤棉个俗称）最流行个辰光。大热天，一个小青年出门，白色个确凉衬衫个表袋里，有一张一折二或者一折四个“大团结”，透过半透明个的确凉，让旁人可以觉得着，人也会显得精神。其实搿一张“大团结”可能是招牌式摆摆卖相个，告咾一般成色非常新，折也折得细心，角对角个。因为伊辰光社会上已经有了“冲手”（小偷），衬衫表袋里个“大团结”忒招摇了，一旦拨偷脱，双脚跳都呒没用。乃末小青工表袋上会插上一支钢笔，钢笔正好夹牢“大团结”，既显得有文化，又是为“大团结”加了一把防盗锁。

　　“大团结”是门面，过日脚还是要靠零碎钞票，最草根个是一角两角还有硬币，杂乱一把个塞辣裤子袋袋里。派用场个辰光，从袋袋里摸出来，一把“癞头分”——搿个诨号，虽然是对硬币个勿恭敬，却也勿失形象，台子浪一撒，硬币总是散开去，加上当年头浪长疖交关普遍，散开个硬币勿是很像癞头？或许还有一枚硬币滚了出去，落到地浪继续滚，一直滚到橱底下床底下个旮旯里。待到趴辣地浪向拿了扫帚或者竹竿，终于“完璧归赵”时，已是一身尘垢。也有个辣过年大扫除辰光，辣一个角落头，发现一枚硬币，小小个惊喜，足以大大个炫耀。“癞头分”一点也勿癞。 

　　硬币塞辣裤袋里，受伤害个便是裤袋。日复一日遭受硬币、钥匙之类磨损而吃勿消个裤袋，有一天莫名其妙个有了一只洞，有几只癞头分从漏洞里流失，自己都浑然勿知。乃末就有了类似《路边拾到一分钱》个经典传说。 

　　用出去个是洋钿，囥了屋里个是钞票。迭个有点玄妙。洋钿总是具体数字个后缀，钞票才是老敦实老安全个感觉。屋里要囥点钞票，出门要多带点钞票。钞票囥辣屋里，其实也勿是囥，无非钞票是要紧个东西，勿用“囥”，显示勿出钞票个重要。如果屋里只有一个抽屉有锁，葛末钞票板数就辣其中。虽然搿一把锁，几乎呒没任何个防范能力，防君子勿防小偷。 

　　“囥了家中个是钞票，囥辣个人身上就勿是钞票了，也勿是洋钿，是私房铜钿。私房铜钿是私房钿个全称。都是钱，也都是辣同样个年代，为啥还会有洋钿和铜钿之分？洋钿搿一个概念始于由西东渐个纸质钞票，铜钿不一样，充满了几千年来个中国传统文化，也就是说，有铜钿个时候，就有了囥私房钿个习俗。囥私房铜钿还是小来来，囥得大了，葛就是囥银子了。既有囥，也必有失风，失风个时候，用得着搿能一句：铜钿银子触心境啊。迭个闲话后来也用辣拉股票被套牢个辰光。