阿拉读小学个辰光，呒没补习班脱仔家教个，伊个辰光行“小小班”，老师根据学生子个学习情况，分成一个个课外学习小组，称作“小小班”。小小班安排辣方便接待个同学屋里，阿拉五个同学个小小班就安排辣蒋晓丽屋里。

　　埃个是一段老值得怀念个美好时光，除脱同学间互帮互学、共同进步、一起交流、一道白相个同窗友谊，蒋晓丽个阿娘，一位道地个上海老人个为人处世，也拨阿拉留下了难忘、温馨个记忆。

　　五个人来辣伊拉屋里几个钟头，而且是长年累月个，阿拉又勿是老懂事体、老乖巧个小囡，争争吵吵、调皮捣蛋经常有个呢，换个大人，就会嫌比、甚至要轰走阿拉了，是？但是蒋晓丽个阿娘好脾气，心善人也好啊，伊从来勿会呵斥、责骂阿拉，伊总是慢腾腾轻悠悠个跟阿拉讲，小朋友要团结友爱，勿好喉咙介响，像寻相骂一样个。阿娘像老师，辅导员，看到阿拉勿好、出格了，伊就会立出来主持公道，好言好语帮阿拉讲浅显个道理，老有耐心个教育阿拉。

　　有辰光，阿娘会请客阿拉吃伊做个点心，啥个南瓜糯米饼、米粉糕、萝卜丝饼，我因为是北方人，迭样子个点心从来呒没吃过，陌生中感觉老好吃个！辣当时物质供应勿丰富、食品老单一、老缺乏个年代，阿娘个慷慨大方，勿仅让阿拉有了口福，更是暖了阿拉个心哦！

　　阿娘勿像有种介老人，上了年纪就自暴自弃，邋里邋遢，让别人看了讨厌、惹【sha】气、嫌比，阿娘老有腔调，整个人老清爽个！除脱衣裳清爽，阿娘头发也老讲究，伊拿木刨花搭仔夹竹桃个叶子泡制“护发水”，用梳子蘸了梳头，一头灰白个头发总是梳理得服服帖帖一丝勿苟，随后挽成一个髻，用一只黑线网罩住，显得干净利索，迭样子个老人，侬看一眼就会有好感。

　　阿娘老勤快老能干个，伊会腌萝卜、青菜勿算，还会自家做豆瓣酱、豆腐浆，到夏天茄子便宜个辰光，伊还会用茄子为主料，做成比酱瓜还要好吃个小菜，阿娘个勤快能干让蒋晓丽屋里个餐桌多了别人屋里呒没个丰富告美味，实在令人羡慕、嫉妒、爱哦！

　　阿娘个好，让蒋晓丽借光勿少，蒋晓丽人长得矮，身体也勿大好，但是呒没同学欺负伊，大家侪对伊蛮好个，选班干部辰光，阿拉就投蒋晓丽个票，阿拉感觉阿娘对阿拉好，阿拉投蒋晓丽个票是应该个。小囡么，想法简单呀！

　　我个阿奶、外婆辣海我出生前就过世了，小辰光，我一直眼热屋里向有老人个小朋友，尤其羡慕蒋晓丽，伊阿娘个慈祥、善良、勤劳、能干、干净告自爱，拨我留下了太美好、太深刻个印象了。