阿拉小辰光，弄堂里白相个花头多得勿得了，啥个“造房子”、“踢毽子”、“跳橡皮筋”、“刮香烟牌子”、“撑骆驼”、“官兵捉强盗”，等等，等等。不过有一种白相，恐怕年轻一眼个侪记勿得了，迭个就叫做“斗香棒”。讲起“斗香棒”，难免要涉及到一点迷信色彩。搿就是勒辣农历七月三十地藏王生日，据讲是九华山地藏王显灵之日，当时家家人家侪要勒辣地浪遍插棒香，祈求地藏王菩萨保佑祛病消灾。到了搿日，弄堂里个人侪跑到室外，弄堂、屋里门口，勒辣空地浪插棒香，端一只小碗盛满清水，放辣地浪向祭供；大人还关照小人要蘸点碗里个清水擦擦眼睛，据说会眼目清亮。搿当然有点迷信，也勿大卫生。但心里是交关虔诚个，虽然也勿磕头跪拜。

　　搿一天对男小囝来讲是十分开心个，一年中也只有搿天能获得邪气多个香棒，可以白相了。地藏王生日勒辣夜里，夜饭喫好，天暗下来了，家家户户勒辣地浪插满棒香，弄堂里星星点点，人影晃动、香烟缭绕，蛮有眼神秘色彩；小人嘛满心欢喜，走来走去，尽管嘴巴里勿讲，生怕惊动地藏菩萨，但心里盼望棒香早早点完，可以拔香棒。大概一个小时左右，香侪点光了，小朋友们抢着伛下腰来拔香棒，勿管自家个邻居个，看啥人拔得多。过脱一两天，弄堂里就有小人白相香棒了。一种是挑香棒，就是拿一把香棒甩在地上，重重叠叠，再用一根香棒去挑，挑起其中一根就算赢，而触动了别个香棒，就算输，由别人再挑，以此类推，以锻炼人个细心搭耐心。另一种是三根香棒，用三只指末头朝地上转甩，形成大小勿一个三角型，根据大小用自己手中香棒捣进捣出三下，如果勿碰着，就赢了，对方就赔侬同样数量个香棒。如碰着，再由别人来。虽然蛮简单，也有些小技巧，也蛮有趣。搿个辰光生活简朴，科技也勿发达，小人个游戏也只有迭眼眼。据说，后来个绒线棒游戏，就是从此而来个。

　　几十年过去了，随着社会发展、科技进步、破除迷信，地藏王菩萨生日插香个陋习，早已销声匿迹，要跑到庙里才能看到进香烧蜡烛，所以弄堂里斗香棒个游戏也绝迹了。只有60岁以上个老先生才能依稀回忆起迭个斗香棒个游戏，真有点恍然隔世之感。