辰光过得老快，眼睛一眨【sa】，又【yi】要过年了。想到早几年垃拉老房子过年个味【mi】道，心里真是蛮感慨个。 

　　过年气氛个高潮，大致是从大年夜下半日开始个。屋里向大大小小侪到齐，阿拉小囡也勿出去白相，而是相帮大人做家务，打杂差，即使平时犟头倔脑个老二，迭歇也变得交关听闲话。但是有一样事体，姆【m】妈是勿会让阿拉去做个。就是外面一声“男高音”：“马桶拎出来！”姆妈会立刻放下手里个事，要紧勿煞将马桶从楼浪拎下去，拎到大弄堂里，倒掉，刷清。因为埃个辰光老房子呒没卫生设备，且明朝大年初一早浪向，是勿作兴倒马桶，也勿可以倒垃圾，主要为讨口彩，“黄金”、“财产”勿外流。现在想想也觉得蛮发噱个。搿个辰光老房子是的的刮刮个“七十二家房客”。灶头间里，五六家人家，一道烧年夜饭，走进走出碰着勿算，转身连屁股也要卡着。煤炉浪向，迭家人家笃蹄髈，大砂锅里“卜落卜落”；埃家人家氽爆鱼，油镬子里“嘁里嚓啦”。还有，宁波爷叔垃拉斩肉酱“乒乒乓乓”；苏北阿舅辣海拍肺头“啪嗒啪嗒”，各种声响彼伏此起，交关闹猛。过年，离勿开用自来水。从弄堂口个弹格路，一直到天井里，延伸到楼梯浪向，侪是湿塔塔个，几乎呒没一块干个地方。横竖脚浪是旧棉鞋，踏湿了也勿要紧，明朝年初一有新棉鞋着。年夜饭，小菜花头多，来勿及烧，家家人家侪用两只煤炉操作。屋里向四五只热水瓶还供勿应求，大人就差阿拉小人到弄堂口老虎灶去泡水。喔唷，老虎灶泡开水也排长队，有拿好几只热水瓶个，甚至还有提着铅桶盛开水，准备回去杀鸡鸭个。为了省地方，平时八仙桌是靠墙摆个，台子里档难免龌龊，所以要团团转转揩得清清爽爽。 

　　年夜饭桌浪个小菜，是一年到头最丰盛个，多得摆勿落。冷菜有皮蛋肉松、椒盐花生、白切肚子、熏青鱼、鸭肫肝、白斩鸡、腊肉香肠等；热炒是冬笋肉片、糖醋小排、红烧黄鱼、素什锦、三鲜蹄筋、笋干烧肉等。台子中央一只紫铜暖锅，炭火老炀，小烟囱四周滚开个汤水里，翻滚着肉圆、鱼圆、线粉、蛋饺等。大人关照，菠菜要现烫现吃。无意当中，阿拉小人发现“新大陆”：线粉碰着烟囱，会发出“嗤啦嗤啦”个响声，而且烫得发黄微焦，吃起来特别香脆，既好白相又好吃。平常辰光爹爹看到阿拉捣蛋要板面孔个。大年夜，伊也变得宽容了。年夜饭吃好要帮大人搓圆子，还要包出花头，做几只元宝形个，啥人吃着福气好。不过，在烧个辰光，还要放红、白两种桂花糖年糕，吃起来软糯香甜。大人讲，大年夜要守岁，叫阿拉小人勿要睏觉【gao】，等着看床底下老虫【鼠】做亲。可是勿到十点半，阿拉上眼皮搭下眼皮打相打了，钻到被头里，伴着枕旁个新衣、新鞋，进入了梦乡。 

　　年初一一早浪，还呒没睏适意，就拨辣天井里个爆仗声惊醒。着好新衣、新鞋（姆[m]妈亲手做个蚌壳棉鞋，鞋底梆梆硬，像戏台浪官老爷个靴子），揩面吃过汤圆，就豪燥去摸摆垃枕头下面个压岁钿。到弄堂口玩具摊上，买一把转轮手枪，配上颗粒大、声音响的大号个火药纸。搿个火药纸背面印辣海：“乓乓乓，枪声四处响。三星打火纸，粒粒皆响亮。”夜里向，我搭邻舍小伙伴垃拉老弄堂里开战，从马路边打到天井里，从前门打到后门，来得个扎劲。几十个春秋过去，老房子过年个情景，只有垃拉睏梦【mang】头里啦！