王小姐是新上海人，五年前从山东来到上海求学，毕业后寻着了一份稳定个工作。伊为了更加好个融入上海社会，一直积极个学讲上海闲话，劲头邪气大。不过呐，伊讲个上海闲话常常分勿清爽有种介字应该哪能讲，我听伊讲上海闲话觉着蛮滑稽个。喏，我讲只笑话拨侬听听，昨日仔搭，王小姐搭我讲，礼拜日【niK】伊到“大【dhu】光明电影院”去看了一场电影，伊拿“大光明”个“大”【da】讲成了“杜”音，我听见仔笑得来肚皮痛。搿种滑稽来死个事体伊也勿是第一趟了，上趟伊还拿“大【dhu】块头”【大胖子】讲成了“汏【dha】块头”。我就搭伊讲，“大”迭个字垃拉上海闲话里向有两个读音：一个读“汏”，就是“买汏烧”个“汏”，“大光明电影院”个“大”要读“汏”；还有一个读“杜【dhu】”，像“大小”“大娘舅”【大舅舅】个“大”就要读“杜”音，勿要弄错脱。 

　　一个字（勿是多音字）读两种音，迭个叫文白异读，里向一个音叫文读音，还有一个音叫白读音。像“大光明”个“大”，读“汏”是文读，读“杜”是白读。迭个两种音里向，白读音代表了比较古老个音，文读音代表了近现代个音。 

　　实际浪向，文白异读垃拉上海闲话里向还是蛮多个，像王小姐搿能学讲上海闲话个新上海人作兴（可能）勿大晓得。现在我再举几个例子： 

　　“人”，文读音【zen】(人民广场、人造卫星)，白读音【nin】(中国人、好人); 

　　“仁”，文读音【zen】(仁义道德、仁至义尽)，白读音【nin】(杏仁、虾仁); 

　　“味”，文读音【vi】(味觉器官、味精)，白读音【mi】(味道、气味); 

　　“儿”，文读音【er】(儿女情长、小儿科)，白读音【ni】(儿子); 

　　“耳”，文读音【er】(耳目一新、耳机)，白读音【ni】(耳朵)(青浦话“木耳”叫“云耳”，音【yunni】，“耳”读【ni)】; 

　　“二”，文读音【er】(二氧化碳、二流子)，白读音【ni】(第一第二、二两饭); 

　　“嘉”，文读音【jia】(嘉奖令、嘉宾)，白读音【ga】(肇嘉浜路、嘉兴粽子); 

　　“家”，文读音【jia】(家庭、家畜)，白读音【ga】(一家人家、做人家【节俭】); 

　　“马”，文读音【ma】(马马虎虎、巴拿马运河)，白读音【mo】(马戏团、马兰头) 

　　“巴”，文读音【ba】(作家巴金、巴黎公社)，白读音【bo】(巴勿得【巴不得、迫切期盼】、嘴巴、尾巴); 

　　“物”，文读音【fheK】(失物招领、物理学)，白读音【meK】(啥物事【什么东西】); 

　　“生”，文读音【sen】(幸福生活、生物学)，白读音【sang】(做生活【干活】、吃生活【挨揍】); 

　　“戴”，文读音【de】(不共戴天、爱戴)，白读音da(戴帽子、戴眼镜); 

　　“学”，文读音【yhiaK】(戏剧学院、科学研究)，白读音【hhoK】(大学生、学外语); 

　　文白异读是由历史原因造成的，老上海人一般侪分得蛮清爽个，不过有种介字文读白读侪可以个，像家乐福超市，有人讲是“【jia】乐福超市”，有人讲是“【ga】乐福超市”，“人事科”，有人讲是“【zen】事科”，有人讲是“【nin】事科”。迭个倒呒没定规。新上海人学讲上海闲话，一定要分清爽文白异读，否则个闲话，我要牵侬头皮个【善意地取笑】啊。