迭个礼拜日，搭家主婆到老房子楼下邻居阿扁头屋里向茄山河。阿扁头屋里向蹲拉前楼。暖哄哄的冬日阳光洒辣拉八仙桌浪，一头吃龙井茶，一头笃香瓜子，有一句呒一句个茄山河。阿扁头讲，阿哥，侬还记得勿记得侬大阿妹小年夜托人带来一行【hang】李袋香瓜子个事体。 

　　哪能勿记得！垃拉我脑子里，过年侪是有了年货再会得成为一个特别个日脚。垃拉我蹲过个瑞康里，弄堂靠近海伦路个食品店，只有到过年迭个辰光，店里向个货架浪会增添平常难得一见个长生果、红枣、跟我小妹顶喜欢吃个香瓜子。垃拉迭个食品少得一天世界个年代，要依据家庭人口多少，凭小菜卡分“大户”、“中户”搭“小户”来分配所谓个年货。可以迭能讲，搿辰光上海大多数家庭如果想解解馋，也只有垃拉过年辰光再能实现迭个美好欲望。我记得煞煞清【很清楚】。上个世纪七十年代初个小年夜，当时垃拉黑龙江军垦农场个大阿妹托人带来一只鼓胀胀个行李袋，袋口浪缝了一块白布，端端正正写了“年货”两个字。打开一看，啊！原来是阿拉日想夜想个介许多香瓜子！当时阿拉激动得大声叫起来，还引来了客堂间大宝一家，前楼阿扁头个两个姐姐告亭子间爷叔也来轧闹猛。急吼吼个小妹盛了一铁锅立时三刻【马上】升火炒将起来，呒没过一刻钟，楼上楼下瓜子个香味是一天世界。搿歇辰光，小囡侪眼钩钩地盯老香瓜子，移勿开脚步。后来，阿拉拿来自黑土地个香喷喷瓜子，分成一包包，当作宝贝送拨拉邻居，让伊拉一道分享迭个飞来年货。到现在我还记得亭子间爷叔讲个“经典”闲话。当亭子间阿姨下班回来，看见爷叔垃拉厨房间津津有味地嗑香瓜子，就嘲伊，小人嘴巴馋，侬大人轧什么闹猛啊！垃拉阿拉弄堂里有冷面滑稽之称个爷叔笃悠悠地应答，勿是我嘴巴馋，是我肚皮里个蛔虫馋，想过过念头。戏话刚讲好，厨房间里正垃烧夜饭个邻居侪笑出了眼泪水，大家连连叫：精彩！ 

　　现在吃香瓜子是平常得势了，只要侬有胃口，随时随地侪可以换换口味。也许，现在个小年轻会搞勿懂，侬讲个“飞来个年货”个事体真个介有劲啊？！勿相信侬可以问问侬周围个阿姨爷叔。当年阿拉吃年货，真个只有垃拉过年辰光再好过年头。