上海滩浪向晓得五福弄个人，可能是老少老少个。能晓得五福弄名称个来历，可能更加少，即使像阿拉辣海五六十年前就辣辣附近个西姚家弄小学读书，也呒没注意到有搿条弄堂。最近我辣海看老里八早个上海老地图辰光，再晓得五福弄个历史蛮长远个。 

　　辣辣1932年出版个老城厢地图浪向，我特地用红粗线标辣海个，就是现在个学院路搭五福弄。地图浪向个“老学前街”，就是现在个学院路东头，当中是县东街，西头是县西街。想想也蛮有意思个事体，实际浪向五福弄就是老城厢老有历史老有名气个学院路当中个134弄，离四牌楼路就几步路，阿拉就是有眼勿识泰山。

　　有一趟阿拉故地寻踪，碰着一眼老城厢年纪老大个老伯伯、老阿奶，总欢喜问一声“你老里八早就住辣搿搭”？向伊拉打听点老里八早搿条弄堂个来龙去脉。真是无巧勿成书，今年元旦，我辣老城厢碰着屋里住浪五福弄个夏老先生，年龄八十八岁。问伊五福弄历史来源，老土地个伊，讲起来老扎劲个：五福弄倒勿是五个啥个福，是五个老板一道出钞票造搿条弄堂个。五个老板个姓，伊记得倒蛮清爽个——张、李、王、陈、秦。原来迭能个，五福弄就是五个老板共同投资有福个弄堂，蛮好白相个。

　　五福弄有“福相”，就要讲到1937年11月东洋人飞机辣辣南市掼炸弹了，搿位夏老先生，当时只有3岁多点，亲眼看到有只炸弹在五福弄东南角浪凌空而下，爆炸声响得来勿得了，五福弄前后周围拨拉伊炸得来一天世界。当年11月15日个《申报》还登载了“南市焚烧浩劫”个报道，周围“亦遭焚烬”，只有五福弄命大有福相，幸存下来了。而出生于五福弄个搿位夏老先生，同样命大福气大，东洋人个炸弹呒没炸到伊，废墟中幸存后，到现在已经88岁了，身体邪气健康，老早个事体还记得老清爽个。伊还讲，老里八早伊拉屋里向穷得来溚溚渧，后来全凭1949年以后读补习班，让伊有了文化。伊还有一桩蛮自豪个事体呢，就是辣1982年新民夜报复刊个辰光，已经58岁，还到夜报帮大名鼎鼎个“林放”先生（即赵超构先生）整理了5年资料呢！勿是伊亲口讲出来，真个让人勿相信，辣辣介小弄堂里向个棚棚房子里，还有个蛮健谈个“林放”先生个老同事。

　　真是蛮有“福相”个五福弄，蛮有“福气”个夏老先生！