有人问：有阿里点地方通用上海话？现在整个上海市版图里向个人讲个侪是上海话呢，还是只有现在上海城区范围里向个人讲个是上海话？

　　搿个问题回答起来比较复杂，要分两篇文章来讲清爽。

　　首先要讲明白个是：语言区域个划分，是要拿语言特征作为划分个标准个，伊搭行政区划往往有差别，否则江苏吴江辣前几年刚刚划进苏州市，难道可以讲伊拉侪讲个是苏州话?上海市版图里个松江、青浦、奉贤、崇明咾啥，是1958年从江苏划进上海个，到现在只有55年，比起漫长个方言历史来讲也不过是短辰光。当然古代长期稳定个州府区划对语言个聚合也是有相当大个作用个，葛咾开埠前个上海话搭松江话邪气相像。辣辣现今上海市个行政版图里向，可以用语言个勿同分布划分成几个方言区，上海方言区辣现在上海市版图个东部黄浦江两岸，大致就辣明清松江府原上海县个地域里。

　　英国传教士艾约瑟辣1853年上海开埠勿久，出版了一本《上海方言口语语法》，里向讲到上海话告西面松江话有一个阳平声调个重要差别，是西面发音31降调，东面22平调。辣辣20世纪80年代初，阿拉拿搿个阳平声调22，还有第一字为阳平声调个两字组词语（如：媒人、蹄髈、长城、铜铃）读作23+44舒长调（现在辣乡下或者沪剧老唱片中可以听得比较明显）为标准，拿讲上海话个地域范围划出来了，伊个北面搭仔西面包括下头搿点地方，构成一条搭北部嘉定方言区、西部松江方言区个边界线：如今个嘉定区吴淞江北岸个封浜（地名侪包括镇乡），普陀区个长征、桃浦、真如，闵行区个纪王、诸翟、华漕、新泾、梅陇、虹桥、曹行、陈行、杜行、鲁汇，徐汇区个龙华、漕河泾，长宁区个北新泾、程家桥，宝山区蕰藻浜以南个淞南、大场、庙行以及葑塘（即祁连）个东部，虹口区个江湾，杨浦区个五角场等。加上辣搿个范围里向个上海市城区，今浦东新区，还有奉贤区个四团、平安、泰日北部、头桥北部。上面搿点地方侪是原来讲上海话个区域。老上海方言最有权威有代表性个地方一直是原县治所在地，就是今黄浦区人民路和中华路环线之内个地域。

　　辣现在上海市管辖范围个长江三角洲浪向，方言主要可以分两大块（此外还有崇明方言区搭属吴江方言大区个练塘方言区），古松江拿搿块三角洲分为淞南和淞北两块，淞北地域个语言统称嘉定方言区，搭旧苏州府个太仓、昆山语言接近；淞南一直到杭州湾长期属松江府管辖，辣松江府里向形成了西部个松江方言区搭东部个上海方言区。长期以来，府城松江方言一直是上海人心目中个权威方言，搿种状态一直保持到近代上海开埠。