城市里养狗个风俗起于卅年之前。辣搿之前是“砸烂狗头”个年代，大家勿养狗。辣养狗人家多起来以后，狗狗需要去办理养狗证。无证犬是要被取缔个。记得当时报纸个社会新闻版浪发了搿样个稿子，编辑做了搿样个标题：“某某区昨捕杀恶犬六百余条”。我改为“某某区昨取缔无证犬六百余条”。无证犬勿等同于恶犬。被取缔了无证狗狗个人家已经够吼势了，侬还讲伊拉养了恶犬，火上浇油啊。现在对此个管理松了。我看大马路浪个小狗、小马路浪个大狗大多呒没办过养狗证，一样招摇过市。

　　我被养过狗。女小囡回国省亲，到街上买了条西藏黄个小狗回来。半个月后伊回去了，小狗狗留下来做了我个伴。养狗开始还很有趣。狗很通人性，善解人意。但伊长大之后就要与主人平起平坐了。辣屋里向侬要陪伊白相，到街浪侬要陪伊散步。伊一家头辣屋里厌气了就大搞破坏活动。咬碎书、咬破鞋，打碎瓶、打翻盆，叫侬哭笑勿得。养狗就是被狗套牢，套得瞎牢，一点都动弹勿得。难得有机会可以出门远游，休想。啥人来陪狗狗？好辣现在是有了狗狗旅馆可以寄养伊几天，但开销勿小。所以要想养一条狗个朋友先要想明白了，自由自在与狗狗是冲突个。大型犬寿命十来岁，小型犬可以活上十四、五岁。一旦被套牢，就是搿点长个“刑期”。

　　狗还需要人来训练个。小个宠物犬可以自家来教育。大个工具犬就要由专门人员来调教了。我后来断断续续养过交关狗。大个有金毛、德国黑背狼狗、拉勃拉多，小个有短毛腊肠犬、吉娃娃。呒没教养个狗一有动静乱叫乱吼。勿会上狗厕所。上街散步见人要扑、见狗要吠。训练得当个狗辣与主人散步个辰光，狗鼻子会与主人个膝盖平行向前，决勿超速、也勿落后。勿调皮、勿兴奋、勿激动。好狗决勿会拨主人家添任何麻烦。忠犬还会挺身而出保护主人。工具犬个智商要远远超过一般个宠物犬。毕竟养了狗就是家里多了一个家庭成员。啥人情愿养一个戆大辣屋里向呢。

　　遛狗要讲社会公德。上海滩浪个交关大小绿地现在快变狗狗个洗手间了。大狗小狗都到里向去方便解手。有个小区周边个马路也是狗屎处处。遛狗，主人应该带上塑料袋、手纸为狗狗料理粪便。更认真一点个还可以备上一瓶自来水为冲洗狗尿。搿样才是卫生遛狗。搿样才是五讲四美。有居住条件个养狗人家也应当为狗狗辣家里安置一个狗厕所。天天、时时到马路浪、花园里去给狗方便，方便了自家却糟蹋了大家。难为情？