阿拉小辰光，因为物资短缺，国家采取计划供应，因此买物事个辰光，样样要凭票、常常要排队。 

　　现在回想起来，当时个排队，可以归纳为下头几种类型：　　

　　无奈型——当时买小菜、勿关荤菜、素菜，侪要早点去排队，去晏【e晚】了，要么物事卖光了，要么就剩一眼眼脚脚头了。告咾每天早浪四五点种就要拨大人喊起来，到小菜场排队。想想看，阿拉搿个辰光只有十来岁，早浪向多少要睏；假使再碰着大冷天，从热烔烔个被头窝里钻出来，到马路菜场排队买菜，外加勿是早去就可以早买，一定要等到六七点钟，正式开秤卖菜。怨啊！　　

　　葛末阿有兴奋辰光呢？有！连下来要讲讲亢奋型——春节买年货。因为可以吃到平常吃勿到个食品，像鸡、鸭，像冰蛋，像黄鱼搿些介海产品……外加学堂里向已经放假了，所以早浪向只要大人一喊，搿个叫爬个快了，老自觉个。另外，有辰光听到邻居讲，米店里向有计划外个大米供应，豪燥【sao】拿仔购粮证直冲米店，排队买大米。　　

　　还有一种叫疯狂型——三年灾害辰光，老城隍庙个奶油五香豆勿要计划个，五角一包，一人可以买两包。交关外地人到城隍庙白相，总归要带五香豆作为土特产带回去个。阿拉屋里就住辣城隍庙，排队买五香豆个队伍，每天可以排到阿拉弄堂口。有交关人侪是老排手了，每天看到个；外加伊拉有一帮人，分成两三拨，前头一帮人排到店里向买豆，隔开二三十个人，另外有两个人排辣海；前头搿帮人买好仔马上插到搿个两个人个队伍里……搿能样子循环抢购。当然伊拉每天抢购，派啥个用场，阿拉讲勿清爽。肯定勿会自己吃，因为当时辰光，一个人一个月个最低生活标准是九块钱，所以，五角洋钿还是老结棍个。　　

　　另外还有跟风型——老早城隍庙荷花池广场浪向，就是现在个绿波廊菜馆门口，有一只邮政亭，专门代理邮政业务（是国家个），收发信件、发售书报杂志。每天下午2点左右，总有一队人排辣海，等当天个《新民晚报》。城隍庙里外地游客比较多，再讲搿只邮政亭子正好摆了饭店门口，总有一些外地游客来问“你们买什么？”“报纸”，上海人个“报纸”，搭普通话个“包子”发音比较接近，所以总归有些外地人就跟了后头一道排队，等到到了卖报纸个窗口，才晓得搞错了。不过当时人个文明程度比较高，错了也就是一笑了之，从来呒没外地人责怪上海人；事实浪也勿能责怪上海人。　　

　　顶顶肮三要算尴尬型——老早城隍庙里有两只厕所，附近居民侪是老式石库门房子，或者索性就是自己搭建个简易房，每天早上个方便，就约会辣拉厕所间排队。有辰光急得来，勿晓得碰着一个慢性子，拿仔一张报纸，从第一版个头条，一直要看到末脚一版个戏剧电影广告。搿个等勿及个朋友恨勿得跪下来叫伊爷叔。我一个邻居顶结棍，一趟子有点腹泻，伊坐仔下去，刚刚解决要立起来，想勿到又要来了，只好又坐下去；一歇歇，全部解决想立起来，勿晓得搿个促掐【cokkak】，肚皮里又要来了，只好又坐下去……到后来伊索性勿起来了。排队等伊搿只位子个人，急得跳脚也呒没用。　　

　　当然勿欢喜排队个人也有个，啥人？小偷！因为人多个辰光，大家遵守秩序，排队井井有序，小偷个“第三只手”就伸勿出来了。