活络可以算是上海人个天性。上海人要去办点事体，以一句上海闲话来打冲锋：“让我先去轧轧苗头……”轧苗头，看看苗头，掂量掂量成功率。轧好苗头，见机行事，灵活办事。有苗头就上，呒没啥个苗头就撤。过年，几个朋友约好出一记远门去自驾游。天天看电视来评估全国东南西北个公路交通状况。只见得高速道路上大车小车爬行，各地景区人头满视野。新闻报告春节里向有28亿人次出行辣各种各样个运输线路上。一轧苗头，收摊，大家就孵辣上海算哉。好辣上海马路浪是空荡荡个，车少人稀。搿有点像卅年前个上海滩。到外面去荡荡马路，清静、安静得使人怀旧，叫人想起来了小辰光上海个街景。有勿领笨个两个朋友还是开车上路了。发回来个短信是：“堵辣路浪，20码！”“景区里寻勿到车位，进退两难！”回复拨伊拉个闲话是：“勿轧苗头，苦头吃煞！”新年新势里头脑发热勿轧苗头，拎勿清。一句安慰个闲话也勿发过去。活该。

　　别苗头与轧苗头一字之差，意思就完全勿同了。别苗头，彼此之间来比比高下，来抢抢风头。以现在流行个讲法，即PK。上海个滑稽戏一直想到央视个春晚舞台上去轧一脚、露一手，搭北方人个相声、东北人个二人转去别别苗头。从王汝刚开始到钱程结束，小滑稽和小小滑稽两代独脚戏狠将都到北京去献过宝。可惜个是，勿是伊拉几个上海笑星本事勿大，而是阿拉个上海闲话实在叫全国人民听勿懂。滑稽戏个妙处就辣南腔北调，以各地方言来折服观众。要拿上海闲话翻译成普通话，就一点噱头都掼勿出来了。本帮个腌笃鲜砂锅里要换成饺子汤，我看吃客们都要倒胃口个。滑稽戏已经好几趟从春晚打回票落选了。不过唱滑稽个老少明星还是够顽强个。祝伊拉有朝一日别苗头别过冯巩、蔡明，让上海闲话也到春晚去出出风头。

　　轧扁头又是另外一层意思了。两面受压、两面受气、左右为难、上下难取，轧扁头。辣屋里向，老法个阿婆、新法个媳妇，做儿子个就轧扁头了。辣单位里，上司要向东，部下要向西，做中层个也轧扁头。自家拿勿准主意，又想两面讨好、左右逢源，就难免陷入尴尬和被动。要逃脱轧扁头，刀切豆腐两面光，搿把刀就只有按道理、按规矩来办事体了。只巴望混辣人堆里，一团和气，左盼右顾，上下勿得罪，葛只好一生一世拨人家来轧扁头了。作孽。