晓得弱水有三千，

　　阿拉只需舀一瓢；

　　就算风景交关好，

　　阿拉只要笑一笑。

　　出去白相，常常看到迪只画面：一群人对牢仔远远交搁了空中一只手机，装模作样，龇牙咧嘴。覅笑覅笑，几乎每个人侪做过搿桩事体呃。

　　有辰光搭伊想想，勿晓得回转去看看，除忒看到自家一只面孔笑嘻嘻之外，阿会想得起搿天看到过一眼啥风景？

　　想起前两年曾经到波士顿郊区瓦尔登湖去白相。现在回忆起来，山青青水蓝蓝，还有美国作家梭罗住过个一间小房子，迓迓叫有几分人文气息。不过，后来听说原来个老房子老早就塌忒了，阿拉看见个侪是后来人搭个布景。但勿管哪能，到现在还能感觉到当时清清爽爽个空气，安安静静个树林。当时拍过不少照片，回来后从照相机里倒出来，厾了电脑里，就再也呒没去看过了。

　　想想也是，出去白相，就是换换心情，看看风景。欢喜呃画面总归会得囥了心里向某只角落里，落勿忒。

　　有辰光忙天忙地拍照，倒有点缘木求鱼——爬了树上去寻鱼，方向性错误。至于用自拍杆拍集体照，因为相机镜头小，后排基本上就是吃瓜群众了。当然咯，镜头里有侬呒没侬勿重要，开心就好。